O conselleiro do Medio Rural en funcións, acompañado pola directora da Axencia Galega de Desenvolvemento Rural e o alcalde de Carballeda de Avia, visitou o novo espazo
- José González destacou as posibilidades das instalacións para ser usadas, dentro do plan de dinamización de Muimenta, no eido formativo e laboral -como apoio do Espazo Agrario de Experimentación-, ademais dun uso asistencial e recreativo para os veciños
- Esta cociña comunitaria permitirá dar soporte ás actividades produtivas agrícolas da aldea modelo, o que favorecerá o desenvolvemento da contorna
- O proxecto, que rehabilita unha propiedade municipal, contou con 150.000 euros de financiación procedentes da liña de axudas da Xunta para a creación, mellora e ampliación de servizos básicos locais en aldeas modelo e polígonos agroforestais
Carballeda de Avia (Ourense), 9 de marzo de 2024.- O conselleiro do Medio Rural en funcións, José González, acompañado da directora xeral da Axencia Galega de Desenvolvemento Rural, Inés Santé, e do alcalde de Carballeda de Avia, Luis Milia, realizou unha visita á nova cociña comunitaria da aldea modelo de Muimenta, situada no concello ourensán de Carballeda de Avia.
Na visita tamén participaron varios rexedores da comarca ademais do director da Fundación RIA, Manuel Rodríguez, xunto a alumnos e profesores do quinto curso do grao de Estudos de Arquitectura da Universidade de Navarra (UNAV), e que precisamente realizaron os seus traballos de fin de grao -e que están expostos na Casa do Concello- en colaboración con esta fundación, no marco do plan de dinamización desta aldea modelo ourensá.
O proxecto da cociña comunitaria, que vén de ser rematado, contou con 150.000 euros de financiación procedentes da liña de axudas da Xunta para a creación, mellora e ampliación de servizos básicos locais en aldeas modelo e polígonos agroforestais. Neste sentido, o conselleiro en funcións lembrou que o prazo para solicitar estas achegas na convocatoria de 2024, dotadas cun orzamento de tres millóns, segue aberto ata o vindeiro 21 de marzo.
A iniciativa rehabilitou unha propiedade recentemente adquirida polo Concello -formada por dúas edificacións anexas, palleiras e cortellos, e un pequeno patio- a través dunha actuación que recupera os volumes orixinais das edificacións e mantén os muros de granito, sempre tendo en conta o confort dos usuarios e a versatilidade dos espazos.
José González destacou as posibilidades que ofrecen estas instalacións -que contan cun espazo de cociña equipado de xeito profesional, comedor e baño, ademais do mencionado patio exterior- para ser usadas, dentro do plan de dinamización de Muimenta, no eido formativo e laboral -sendo apoio do Espazo Agrario de Experimentación-, ademais de ter un uso asistencial e recreativo para os veciños. Neste sentido, o conselleiro en funcións puxo de relevo as pancas que ofrece a Lei de recuperación para potenciar o territorio, a través de actividades agrogandeiras e, tamén, coa mellora e modernización dos propios núcleos rurais.
González insistiu na capacidade tractora dos plans de dinamización das aldeas modelo, estando activados este mesmo ano o de Muimenta -deseñado pola Fundación RIA-, ademais de Osmo (Cenlle), O Penedo (Boborás) e Trascastro (no Incio)-. Estes plans serán unha “referencia sólida” para confeccionar un modelo xeral de rexeneración dos núcleos rurais a través de catro fitos: impulso da actividade económica, rehabilitación integral das aldeas seguindo criterios de arquitectura tradicional, planificación preventiva reducindo ao máximo o risco de incendios forestais e a aposta polas “aldeas intelixentes”, con garantía de conectividade dixital e autosuficiencia enerxética.
Usos potenciais da nova cociña comunitaria de Muimenta
Esta cociña comunitaria busca dar apoio e continuación ás actividades produtivas agrícolas da aldea modelo, o que favorecerá o desenvolvemento do rural da contorna. As instalacións permitirán o procesado das producións locais para empaquetar, conxelar ou elaborar produtos, xa sexa por parte dos veciños particulares ou como iniciativa empresarial para a distribución comercial de produtos elaborados; o que configura un ecosistema idóneo para a posta en marcha de iniciativas emprendedoras.
Ademais, a cociña pode dar apoio ao propio Concello no referido ao servizo de asistencia a domicilio, ao permitir preparar comidas e atender aos usuarios. Este novo espazo servirá á súa vez como lugar de encontro para os habitantes da zona, e pode servir de infraestrutura de soporte a novos veciños nun formato de modelo residencial comunitario contemplado polo plan de dinamización de Muimenta.
Espazos Agrarios de Experimentación
Cómpre lembrar que aldea modelo de Muimenta acollerá o primeiro Espazo Agrario de Experimentación, que entrará en funcionamento este mesmo ano. A instalación proxectada está destinada á formación hortícola, a través de tres parcelas de traballo nas que se situará un invernadoiro de ata 600 metros cadrados en cada unha delas, cun sistema de regadío e cinco hortas de 400 a 500 metros cadrados na súa contorna.
O obxectivo destes espazos, que están sendo elaborados en colaboración con expertos do Colexio de Enxeñeiros Agrónomos de Galicia, é facilitar que as persoas emprendedoras poidan probar o seu negocio nunha contorna favorable, con terra e instalacións necesarias para o desenvolvemento dunha actividade. No caso de Muimenta, 15 hectáreas están dedicadas a agricultura ecolóxica, especialmente a cultivos de horta
As aldeas modelo
A aldea modelo de Muimenta ten unha superficie total de 29,1 hectáreas, distribuídas en 1.660 parcelas de 241 propietarios. En Galicia hai hoxe 21 iniciativas deste tipo -14 na provincia de Ourense- e todas elas estarán en funcionamento antes de que remate o ano.
Esta iniciativa, enmarcada na Lei de recuperación da terra agraria, busca fomentar a posta en marcha de actividade agrogandeira en terras que se atopan en estado de abandono ou infrautilización, dinamizando os núcleos das aldeas, favorecendo a remuda xeracional e fixando poboación no rural. Esta norma, que tamén contempla outros instrumentos como os polígonos agroforestais, as agrupacións de xestión conxunta ou as permutas de especial interese agrario, contribúen á prevención e á defensa contra os lumes.
