FRANCISCO JOSÉ FRAGA CIVEIRA SERÁ O CANDIDATO ÁS ELECCIÓNS AUTONÓMICAS DE ESPAZO COMÚN-RECORTES CERO-OS VERDES POLA PROVINCIA DE OURENSE
A súa experiencia de doce anos como exemplar alcalde dun concello situado no epicentro da debacle poboacional outorgalle un inmellorable punto de partida para loitar pola defensa da provincia esquecida
Por unanimidade, as bases de Espazo Común, tomaron o acordo de designar a Francisco José Fraga Civeira coma número 1 da súa candidatura para as vindeiras eleccións autonómicas do 5 de abril pola provincia de Ourense.
A proposta foi igualmente aprobada con apoio total polos socios da coalición que concorrerá a este proceso, Recortes Cero e Os Verdes.
A experiencia política que atesoura a pesares da súa xuventude foron factores decisivos no apoio total recibido pola proposta.
Alcalde de Piñor entre 2003 e 2015, vicepresidente executivo da FEGAMP entre 2007 e 2011 ao que suma a portavocía do Grupo Socialista na Deputación de Ourense, Fran Fraga pode presumir de ter sido un dos rexedores máis novos de Galicia e de ter loitado a brazo partido dende este posto contra a inercia negativa dos concellos pequenos desta provincia.
Durante o seu mandato, Piñor conseguiu un enlace coa autovía Ourense-Santiago que evitou o illamento deste concello; creou servizos daquela case inéditos para a atención das persoas maiores coma o de lavandería ou xantar a domicilio; puxo en marcha servizos de conciliación para fixar a poboación máis nova, impulsou a compostaxe doméstica e conseguiu que Piñor fose un referente en Galicia en materia de medidas de apoio á poboación rural.
Fran Fraga afronta o reto cunha tremenda ilusión e consciente das dificultades que conleva levar a unha coalición de pequenos partidos a pelexar por un posto no parlamento galego cos grandes partidos tradicionais e o seu poderío.
Sen embargo, afirma ter a certeza de que “desta volta, Ourense espertará e fará valer a súa voz para dicir basta”.
Fraga cifra en 10.000 votos os necesarios para que a provincia de poida contar á fin con representación propia e exclusiva en Santiago.
“É necesario que alguén defenda a Ourense sen ter que render contas a Madrid, Santiago ou Vigo. Nesas ecuacións sempre saimos perdendo. Os datos e a involución de tódolos indicadores socioeconómicos falan por si mesmos”
Confía en elaborar unha lista o máis representativa posible das comarcas, das problemáticas e das realidades de cada recuncho da xeografía provincial para que a cidadanía teña cada vez máis claro que de querelo así e apoiar a súa candidatura, á fin “Ourense decide”.
