Tres mil profesionais utilizaron o Pazo de Deportes como centro de apoio a transportistas e persoal esencial na loita contra o COVID-19

Éxito da medida posta en marcha pola Deputación de Ourense, que ofrece na maior instalación deportiva da provincia servizos para hixiene, cátering e descanso, que os usuarios valoran moi positivamente

Policía Local (21 %), Garda Civil (14 %), e sanitarios e persoal de recollida de residuos (12 % cada un), son os sectores profesionais que máis fixeron uso destas infraestruturas nun mes

AVANTAR ACTIVIDADES

Tres mil profesionais utilizaron nun mes as instalacións do Pazo de Deportes “Paco Paz” da Deputación de Ourense como centro de apoio a transportistas e persoal esencial na loita contra o COVID-19. Todos eles valoraron moi positivamente esta medida de apoio que o goberno provincial ha posto en marcha para axudar ao persoal implicado na prestación de servizos esenciais, ofrecéndolles servizos de hixiene, cátering e descanso, “o que se traduce nunha exitosa acción de colaboración con quen está dándoo todo, profesional e persoalmente, nesta pandemia na provincia de Ourense, e a Deputación quere dispoñer os medios posibles para facilitarlles ao máximo o seu labor”, expresa o presidente do goberno provincial Manuel Baltar, quen agradece a todos os colectivos “o seu traballo esencial nesta crise sanitaria, pola entrega e profesionalidade coas que están a actuar”.

Baltar destaca que o maior recinto deportivo da provincia de Ourense “púxose ao dispor dos profesionais do transporte e do persoal implicado na prestación de servizos esenciais, con servizos de hixiene, descanso e cátering, este último ofrecido pola asociación de ámbito social “ Aixiña”, a cargo da Deputación de Ourense”. Trátase dunha medida integrada nas iniciativas que desenvolve a Deputación na súa loita contra a pandemia e que ten como obxectivo “ofrecer un lugar destinado á hixiene persoal, así como ao descanso e manutención básica, para estes profesionais que están a dar o mellor en favor da cidadanía no momento máis duro da crise do Covid-19”, valora Manuel Baltar.

Os sectores profesionais que máis utilizaron as instalacións do “Paco Paz” durante este mes foron: Policía Local (21 %), Garda Civil (14 %), sanitarios e persoal de recollida de residuos (12 % cada un), Policía Nacional e Protección Civil (11 % cada un), transportistas (9 %), Policía Autonómica (6 %), e medios de comunicación e bombeiros (4 %).

O presidente Baltar confirmou que as instalacións continuarán abertas e dispoñibles para esta actividade durante o tempo que dure o estado de alarma, manténdose o horario de 6 da mañá a 11 da noite, ininterrompidamente. O acceso seguirá realizándose igualmente pola zona norte do pavillón principal, fronte á parada do autobús urbano, pola entrada de deportistas. E no que se refire á atención e custodia da zona, realízanse por quendas por parte do persoal de Pazo de Deportes, coas debidas medidas de protección.