medio ambiente asesorará ao concello de cortegada na adaptación do contido do plan especial termal ao instrumento de ordenación municipal
Encarnación Rivas trasladoulle a necesidade de revisar as actuacións de urbanización previstas no documento para o desenvolvementos dos usos termais e analizar o encaixe no PXOM, aprobado con posterioridade
A Consellería de Medio Ambiente, Territorio e Vivenda orientará e asesorará ao Concello de Cortegada na adaptación do contido do Plan especial do parque termal ao instrumento de ordenación municipal en vigor.
A directora xeral de Ordenación do Territorio e Urbanismo, Encarnación Rivas, trasladou esta mañá ao alcalde Avelino de Francisco -durante unha visita á contorna do antigo balneario- a colaboración dos técnicos da Dirección Xeral para revisar as actuacións de urbanización que se prevén neste proxecto termal -que impulsa o concello- e analizar o encaixe no Plan xeral de ordenación municipal -aprobado en 2012-, posteriormente o plan especial.
Nese sentido, Encarnación Rivas indicoulle que é necesario adaptar a clasificación dos solos, para garantir a viabilidade das actuacións previstas; pois se ben no plan especial o ámbito está recollido como un sistema xeral de espazos libre e equipamentos, nos planos de estrutura xeral do territorio do PXOM, o solo está clasificado como rústico.
A directora xeral invitou ao alcalde a implicarse desde xa neste proxecto, que ten por obxectivo dinamizar e recuperar varias edificacións e apostar un turismo sostible ligado á cultura da auga e vitivinícola, moi presente na zona.
