O concello do Irixo anuncia que a Eira da Ponte será un anfiteatro antes de que remate o 2022. A antiga Eira da Ponte é un espazo público que actualmente se atopa en mal estado. O obxectivo da administración municipal é transformala nunha área de recreo e ocio acollendo un anfiteatro ao aire libre que se destinará ao desenvolvemento de todo tipo de actividades culturais como actuacións musicais, teatro ou cinema, entre outros.
Este proxecto parte da iniciativa do concello, cun presuposto inicial de 50.000 euros, e para o cal ademais acaban de recibir unha subvención da Secretaría Xeral de Turismo cun importe de 30.000 euros. O proxecto deberá estar executado no próximo mes de outubro tras a adxudicación das obras e da correspondente autorización da Confederación Hidrográfica do Miño – Sil.
A obra consistirá na realización da limpeza integral, o empedrado do chan e a construción do anfiteatro, entre as intervencións previstas.
