O Concello de Piñor informa da posta en marcha dunha iniciativa innovadora no eido da educación familiar, coa colaboración da Casa Neno “Os Cativiños” edo Centro de Saúde de Piñor.
O Programa de Educación Familiar, que se leva ofrecendo dende o Concello de Piñor dende o ano 2006, é un servizo que ademais de traballar de forma individualizada coas familias diferentes problemáticas (menores en situación de risco ou desamparo, conflitividade familiar, dificultades educativas, drogodependencias, etc) tamén leva a cabo actividades comunitarias que permitan traballar aspectos preventivos que favorezan o desenvolvemento axeitado da familia e infancia.
Neste eido, a coordinación cos centros educativos e sanitarios é fundamental para chegar ás familias e ós menores. O Programa de Educación Familiar municipal e a técnica responsable da Casa Neno “Os Cativiños”, poñen en marcha un programa de recomendacións sobre alimentación ás familias. Baixo o lema “Ben comer” xorde esta iniciativa que pretende ser unha guía e apoio ás familias na implantación da alimentación sólida en nenos e nenas asistentes á Casa Neno “Os Cativiños” (Piñor), fomentando o establecemento de menús diarios orientativos que faciliten a variedade e introdución de todo tipo de nutrientes e unha alimentación saudable, cumprindo coas recomendacións da médica de familia do Centro de Saúde de Piñor. Nas Casas Neno as familias deben facilitar o xantar diario á técnica e coidadora dos cativos, pois estes centros carecen de servizo de comedor interno. O obxectivo do programa “Ben comer” é que éstas se animen a seguir os menús recomendados, de maneira que os/as cativos/as manteñan unha dieta similar, variada e saudable, podendo solicitar información, axuda ou asesoramento en calquera momento. Sendo conscientes de que a incorporación de certos alimentos ós cativos produce certas dificultades en moitas familias (verduras, hortalizas, legumes….) e que o estrés do día a día ás veces non permite ter ese tempo de planificación dos menús semanais, o programa “Ben Comer” tamén pretende facilitar esta parte do traballo ás nais e pais, fomentando que tódolos cativos leven á Casa Neno xantares relativamente similares e ofrecéndolles eses menús orientativos semanais ás familias que lles faciliten algo o seu traballo de planificación. Todo isto ademais de fomentar a alimentación saudable nos nenos e nenas tamén facilita a súa adaptación ó servizo do comedor que posteriormente terán nos centros educativos ós que decidan acudir, pois alí tamén atoparán esta variedade.
