- Acometéronse diversas obras de mellora en materia de climatización e carpintería exterior, así como a renovación do mobiliario das súas instalacións
- A oficina sitúase no concello ourensán e dá servizo a toda a veciñanza dos municipios da comarca do Ribeiro
Santiago de Compostela, 7 de xaneiro de 2024.- A Oficina Rural de Ribadavia vén de rematar as obras de reforma da súas instalacións, unha actuación promovida pola Consellería do Medio Rural para a que se destinou un orzamento total de 142.582,11 euros.
Esta oficina, que dá servizo aos concellos que integran a comarca do Ribeiro, mellorou as súas instalacións con novo mobiliario e acondicionamento do interior, con climatización a través dun sistema de aerotermia e coa renovación da súa carpintería exterior. O obxectivo destas actuacións é ofrecer unha mellor atención á cidadanía e aos traballadores da propia oficina.
As súas instalacións atópanse na rúa Redondela da vila, onde comparte espazo co Consello Regulador da Denominación de Orixe Ribeiro. Nelas, préstase atención xeral á cidadanía na materia que lle compete, ademais de servizos agrarios, con especial atención á viticultura, e tamén veterinarios.
