O persoal do Servizo de Prevención e Defensa contra Incendios Forestais da Xunta de Galicia inicia o seu despregamento, por un período de 7 meses, que se suma ao resto do operativo autonómico. En total, son case un milleiro os profesionais que levan traballando 6 meses ao ano e que a partir de agora aumentarán progresivamente os seus contratos ata os 9 meses, co horizonte de 2026.
Este proceso vén de completar o desenvolvido nos últimos anos para aumentar progresivamente o período de actuación dos traballadores dun dispositivo formado por máis de 3.000 persoas, das que actualmente dous terzos traballan durante todo o ano. Unha vez rematado este novo proceso de estabilización, todos os membros do servizo traballarán, como mínimo, 9 meses ao ano.
Precisamente, un dos obxectivos que se persegue con esta ampliación do prazo de contratación é incidir na prevención de incendios, coincidindo coa aprobación do plan preventivo que estará en vigor ata marzo de 2025.
