Esta fin de semana, en concreto o pasado venres pola noite, comezaba a 45ª edición da Festa do Pemento de Arnoia, evento declarado Festa de Interese Turístico Galego.
Esta cita gastronómica busca promocionar este produto, amparado por unha Indicación Xeográfica Protexida, no mercado e exaltar a súa calidade. A conselleira do Medio Rural, entre outras autoridades, foi a encargada de cortar a cinta deste ano e dar o pistoletazo de saída, nunha noite que contou co pregón do Bruxo Queiman e festa coa Orquestra Panorama.
O campo da Queixeira acolleu a unha gran cantidade de xente, que esperaba paciente para desfrutar do pemento en todas as súas versións. Unha festa que, non hai máis que ver o poder de convocatoria para avaliar a súa repercusión. Toda unha fin de semana chea de actividades, con música, xogos, concentración de coches clásicos, e o seu protagonista en todos os pratos.
