Un total de 16 alumnas e alumnos do Carballiño, Boborás e Maside de entre 18 e 25 anos participan no proxecto do obradoiro de emprego xove Carbosam que se porá en marcha na vindeira semana, e no que se formarán a nivel educativo e profesional, neste caso nas modalidades de xardinería e carpintería, baixo a coordinación dun equipo docente dirixido por David Lozano. A presentación oficial deste programa tivo lugar hoxe na Casa da Cultura coa presenza da responsable das áreas de Comercio e Emprego do Concello do Carballiño, Diana González, e a asistencia do alumnado, os dous monitores e a persoa que se encargará das tarefas administrativas. Tanto o director coma a representante do Concello animaron aos xoves a aproveitar esta oportunidade que se lles brinda para a aprendizaxe dun oficio que permita a súa futura inserción no mercado de traballo.
Ao longo dos vindeiros 12 meses, os actuacións deste obradoiro centraránse na posta en valor de espazos naturais senlleiros e de interese turístico e doutras áreas axardinadas dos tres municipios integrados no proxecto. Concretamente, entre outras, contémplase para O Carballiño a reposición e acondicionamento das pasarelas do segundo tramo do paseo fluvial do Arenteiro que se atopan ubicadas na contorna do barrio de Toscaña, As Barcias e o Parque Etnográfico.
No caso de Maside, acometerase a mellora das infraestruturas existentes nos sendeiros que percorren a paraxe natural do Puzo do Lago, mentres en Boborás levaranse a cabo traballos de reparación das pasarelas peatonais que comunican a localidade de Pazos de Arenteiro co Puzo dos Fumes.
