O Salón do Automóbil de Expourense consolídase como o momento e lugar preferido polos ourensáns para adquirir un novo coche. Así o demostran os datos de vendas e visitas desta décimoquinta edición que pechou as portas na tarde de onte en Expourense, logo de celebrar a cita adicada ao Vehículo Novo (a pasada semana) e ao Vehículo de Ocasión (cita desta fin de semana). Ambos os dous salóns celebráronse durante seis xornadas de feira que atraeron ata o recinto de Expourense máis de 9.000 visitas que mercaron un total de 294 coches (114 novos e 180 de ocasión). Os organizadores mostraron a súa satisfacción por estes resultados e indican que esta edición cumpriu ás súas expectativas que pasaban por superar as cifras da última edición (265 coches vendidos e 8.000 visitas). Foi unha cita organizada de forma conxunta entre Expourense e ACAUTO que contou coa participación de 16 concesionarios que representan a 25 marcas.
O vicepresidente de ACAUTO, César Fernández, comentou que “as preferencias dos clientes están nos vehículos diésel de entre catro e oito anos de antigüidade e de pouco consumo, con prezos entre os 10.000 e 20.000 euros, e coa tendencia actual de vehículos máis altos e cómodos para as familias”. A cifra de vendas ascenderá nos vindeiros días, xa que é frecuente que se pechen, durante esta semana e a próxima, operacións comezadas nestes salóns. A esta cifra hai que engadir tamén os 108 coches vendidos durante a última edición do Car Outlet organizada tamén entre Expourense e ACAUTO e celebrada no pasado mes de abril. Á vista destes datos, o Salón do Automóbil volveu cumprir o seu papel de cita esperada polos expositores, para incrementar as vendas do ano, e tamén polo público que agarda a este salón para mercar o seu novo coches, xa que sabe que no mesmo recinto pode consultar a meirande parte das opcións dispoñibles no mercado. Con estas cifras de vendas contribuirase a reducir a antigüedade do parque móbil de Ourense que, con 17 anos de media, é a máis alta de España.
Como incentivo para animar aos visitantes a axilizar o proceso de decisión, a organización volveu poñer en marcha o sorteo, entre aqueles que mercaron un automóbil durante o salón, un bono desconto por importe de 6.000 euros a descontar do prezo de venta do vehículo adquirido e que supón o desconto máis grande realizado en feiras deste tipo en Galicia. ACAUTO realizará esta semana o sorteo ante notario na sede da Confederación Empresarial de Ourense (o martes 26 de novembro ás 12,00 horas) entre as papeletas que cubriron os compradores. A entrega do bono desconto terá lugar o luns 2 de decembro no concesionario que tivera vendida o coche cuxo cupón resulte premiado.
A actividade feiral en Expourense continuará xa nos mes de decembro coa celebración da sétima edición de Sportur Galicia, Salón do Deporte e Turismo Activo, e do quinto Congreso Internacional de Turismo e Deporte que terán lugar no recinto feiral os días 12 e 13 de decembro. Estes dous eventos darán paso xa á actividade deportiva na pista curta de atletismo que albergará esta tempada unha vintena de campionatos e competicións entre os que destaca o Campionato de España de Atletismo Sub-16 Short Track que se celebrará entre o 15 e o 16 de marzo de 2025.
