A localidade de San Amaro celebrou onte o Nadal por partida dobre, cunha festa para a cativada no colexio público e un mercado de artesanía no campo da feira. No primeiro caso, o salón de actos do CEIP Plurilingüe Lansbricae acolleu pola tarde a “Festa PreNadal”, amenizada pola actuación musical do dúo Os Trasnos e onde non faltaron actividades de pintacaras, xogos populares, un mercadillo e un guateque infantil. No segundo, o campo da festa de San Amaro acollía, dende o mediodía, unha feira para a venda de produtos artesanais e alimentarios no que se concentrou un total de oito postos de exposición. Entre eless, unha adicada a venda de embutidos de porco celta, complementos, mel, velas de cera natural ou artigos confeccionados por mulleres da asociación da parroquia das Neves de Grixoa.
Esta é unha primeira edición desta iniciativa do Concello de San Amaro que se enmarca no programa de actividades de promoción do municipio que se levaron a cabo ao longo de todo o ano, tal e como explicaba o alcalde, Fernando Rodríguez. Entre elas, o Entroido, unha ruta cabalar, o festival celta e, hai poucos días, a exaltación do viño de San Amaro para a súa futura incorporación á Denominación de Orixe Ribeiro. Unha cita que dende o Concello confían se manteña en futuras edicións para a difusión dos produtos locais do municipio, nestas datas de decembro previas as festas navideñas.
