Case unha trintena de alumnos e alumnas recibiron hoxe o seu certificado por participar en cursos de iniciación á artesanía, nos oficios de cerámica, bixutería, xoiería artística, coiro e restauración e decoración de mobles. Estes talleres, de 50 horas de duración, foron organizados pola Asociación de Artesáns de Ourense (Adao) en colaboración coa Deputación de Ourense, e impartidos por artesáns e artesás deste gremio. Lucía Casado en coiro, Pamen Díaz en restauración, Mª Isabel Bergantiño en bixutería Miyuki, Mario López en xoiería artística e Miguel Ángel Carrera en cerámica foron os e as docentes destes cursos.
A presidenta da asociación, Olga Santos, acompañada polo deputado de representación Institucional da Deputación, Rosendo Fernández, e a presidenta da CEO, Marisol Novoa, fixeron esta mañá entrega dos certificados aos participantes, que exhibiron os seus elaborados traballos no patio da CEO durante a entrega.
Olga Santos destacou na súa intervención o apoio da institución provincial para levar a cabo estas actividades e poder visibilizar os oficios artesáns. Pola súa banda, tanto Rosendo Fernández como Marisol Novoa, eloxiaron o dinamismo dunha asociación que organiza actividades de todo tipo para que a artesanía perdure e déase a coñecer en todos os ámbitos.
Dado o éxito de acollida e o interese que suscitan estas aprendizaxes, a asociación espera poder repetir estes talleres artesanais e doutros oficios o próximo ano.
