O Consello Regulador da Denominación de Orixe Ribeiro participou un ano máis na feira internacional de viños ‘Prowein’, que se celebrou do 16 ao 18 de marzo no recinto Messe de Düsseldorf (Alemaña). Nesta 31ª edición do evento participaron preto de 42.000 visitantes profesionais do sector vitivinícola chegados de 128 países. A D.O. Ribeiro presentou ao traverso dunha zona de cata libre con 37 referencias de viños brancos, tintos e espumosos, e coa presenza dun stand con catro adegas no espazo ‘Galicia’, promovido pola Axencia Galega da Calidade Alimentaria (AGACAL) da Xunta de Galicia, e que estivo ubicado no pavillón nº 11, adicado íntegramente aos viños de toda España.
Deste xeito, as adegas Casal de Armán, Pazo do Mar, Ramón do Casar e Viña Costeira amosaron os seus viños no devandito stand, mentres no espazo de cata libre poideron degustarse 34 viños brancos, un espumoso e dous tintos de diferentes adegas e colleiteiros da D.O. Ribeiro. A presidenta do Consello Regulador, Concha Iglesias, comenta que “os máis de 220 visitantes profesionais que se achegaron ao noso stand tiveron a oportunidade de catar máis de 50 viños de colleitas diferentes”.
Profesionais do sector, como importadores, distribuidores, tendas especializadas, formadores, sumilleres, medios de comunicación, catadores ou prescriptores, de países como Alemaña, Países Baixos, Bélxica, República Checa, Hungría ou Reino Unido, “achegáronse ao noso stand para mergullarse nos viños nados dos nosos viñedos de pequenas extensions, mimados polos nosos viticultores, e elaborados con cuidado e elegancia polas nosas adegas”, conclúe Concha Iglesias.
