A Consellería do Medio Rural vén de informar da situación dos incendios forestais rexistrados en Galicia con datos recollidos ata as 14,45 horas de hoxe xoves, salientando que as principais novidades arestora son a estabilización dos lumes da Pobra do Brollón-Abrence (Lugo) e o que permanecía activo na parroquia de Santa María de Nieva, no municipio de Avión. En consecuencia, dende o departamento autonómico asegúrase que, nestes intres, non hai ningún incendio activo de máis de 20 hectáreas en Galicia.
O incendio en Avión orixinouse á media tarde do pasado domingo e quedou estabilizado ás 14,40 horas de hoxe, tras afectar a unha superficie estimada de 250 hectáreas. Para traballar na súa extinción estiveron mobilizados cinco técnicos, 34 axentes, 63 brigadas, 35 motobombas, cinco pas, 10 helicópteros e oito avións.
E tras case dúas semanas activo, os equipos de extinción conqueriron controlar, ao fío das 22,00 horas de onte, os lumes inciados o pasado 15 de agosto en montes das parroquias de Vilar de Condes e As Regadas, nos municipios de Carballeda de Avia e Beade, e que logo se extenderon a montes colindantes dos concellos de Avión, Melón, Leiro e Ribadavia, queimando máis de 4.000 hectáreas de superficie. Para traballar na súa extinción mobilizáronse seis técnicos, 114 axentes, 196 brigadas, 110 motobombas, catro pas, dúas unidades técnicas de apoio, 10 helicópteros e 12 avións.
