A plataforma SOS Suído Seixo vén de remitir unha nota de prensa na que subliñan que “Onte, xoves 28 de agosto, diversos medios (Badal Novas entre eles) anunciaban o establecemento da sede fiscal da empresa aragonesa Recuros Minerales de Galicia, S.A. no concello de Beariz. A noticia viña acompañada dunha imaxe da flamante nova oficina decorada cos logotipos de “Mina Doade” e situada na capital do municipio”.
Desde SOS Suído Seixo consideran que “èsta unha máis das manobras de marketing do grupo SAMCA. Non só co obxectivo de dar unha falsa imaxe de empresa responsable e ben intencionada, senón de presentar ilusoriamente o proxecto como aprobado, inminente e inevitable. Noutras palabras, a oficina é parte da estratexia do grupo para desinformar e desmoralizar á veciñanza, facendolles crer que non existe oposición posible á mina”.
Neste sentido, engaden que “proba desta intención de dar unha imaxe de completitude a un proxecto que está lonxe de estar completo, é o feito de que a imaxe presentada nos medios é unha montaxe na que o cartaz superior co logo de “Mina Doade” foi engadida por ordenador. Veciños e veciñas de Doade comprobaron en primeira persoa que a única modificación aparente do local foron os dous pósters colocados nas carteleiras da sucursal bancaria que alí había. Esa mesma tarde, deixaron constancia do seu rexeitamento cubríndoos por fóra con cartaces contra a mina”.
Para SOS Suído Seixo, “esta estratexia de Recursos Minerales de Galicia, S.A., xa ven de antigo, e vimos exemplos dela noutras ocasións. Basta ver a linguaxe ambigua e enganosa coa que anuncian unha mina, segundo eles, “de excelencia para a Unión Europea” ou “de interese público segundo a Comisión”. Afirmacións completamente vacías e estiradas ao extremo da legalidade, e sobre todo, falaces”.
“Desde a plataforma recordamos aos medios e á poboación que a mina de Doade non está aprobada, que se encontra actualmente en proceso de avaliación do impacto ambiental, e que ata o día 2 de setembro pódense presentar alegacións contra el. Lamentamos estas tácticas de desinformación por parte da empresa e denunciamos o malestar e confusión que crean entre os nosos veciños e veciñas”, conclúen.
