O director de Turismo de Galicia, Xosé Merelles, asistiu este sábado ao 30 aniversario da creación do Balneario de Arnoia, un evento no que puxo en valor o papel a traxectoria do Balneario de Arnoia á hora de poñer en valor a aposta que desde a Xunta de Galicia se está a facer polo turismo termal, que concentra importantes recursos nos últimos anos.
No acto, que tamén contou coa presenza da xerente de Galicia Calidade, Ana Méndez, e o director xeral de Maiores e Atención Sociosanitaria, Antón Acevedo, lembrou a relevancia de Galicia no termalismo, a segunda rexión máis importante en toda Europa con máis de 300 mananciais e sete dos oito principais grupos de augas mineromedicinais. Engloba, ademais, o 20% de establecementos deste tipo en España, cunha oferta que suma preto de 3.000 prazas de aloxamento, das que dous de cada tres son de alta gama.
“Desde a Xunta de Galicia recoñécese este potencial como un dos principais recursos a desenvolver a nivel turístico”, sinalou o director de Turismo de Galicia. Merelles repasou algún dos principais movementos desde o Executivo autonómico neste eido, como a creación da Área de Turismo Termal en 2023 ou a posta en marcha do Plan de Turismo Termal posto en marcha este ano, con accións no horizonte 2028.
En concreto, activáronse dúas liñas de axudas no eido do termalismo, centradas na posta en marcha de novos proxectos e na renovación dos establecementos xa existentes que se veñen a sumar ao Plan Territorial de Sostibilidade Turística de Vilas Termais e Cascos históricos, cunha inversión prevista de máis de 21 millóns de euros ata 2026 con fondos europeos Next Generation.
Este tipo de turismo contribúe significativamente á desestacionalización da oferta e á súa redistribución territorial, incidiu o director de Turismo de Galicia, e apóiase noutros recursos, como a oferta enogastronómica e o patrimonio natural e histórico, “co que se enriquece esa experiencia única que queremos que sexa a marca de calidade do turismo en Galicia”, sintetizou.
Luis Menor apunta á investigación científica como “o gran reto termal”
O presidente da Deputación de Ourense, Luis Menor, reafirmou, pola súa banda, o compromiso da institución ourensá co termalismo como gran motor “económico, social, cultural e identitario” da provincia. Menor puxo en valor o acordo pioneiro ao que chegou a Deputación, xunto ao Concello de Arnoia, polo que o pasado mes de xullo de 2024 se logrou o compromiso da Fundación San Rosendo de ampliar a apertura do balneario, co apoio da Xunta de Galicia, e mellorar os seus servizos. “Hoxe estamos celebrando tres décadas dun balneario referente grazas á cooperación e ao diálogo”, sinalou Menor.
O presidente provincial felicitou a tódolos traballadores e axentes implicados na historia do balneario de Arnoia pola continuidade dun modelo de balneoterapia que, dixo, “é unha auténtica vangarda na que se fixan no resto de España”. E amosouse tamén convencido de que a colaboración e o traballo conxunto con Caldaria permitirá avanzar na consecución doutros proxectos de importancia para toda a provincia, como por exemplo novos establecementos termais na capital.
Menor puxo o foco na investigación dos efectos das augas mineromedicinais como “a gran oportunidade” e o “gran reto” do termalismo ourensán. Neste sentido, lembrou que o balneario de Arnoia foi o primeiro de España en realizar estudos hidroxeolóxicos nos anos noventa. “Aquilo foi unha revolución no eido termal e marca o camiño para que a investigación e a acreditación dos beneficios das nosas augas sexan a verdadeira punta de lanza desta provincia”, apuntou o presidenta da Deputación.
Durante o acto de celebración dos 30 anos do balneario, Menor e o resto de autoridades realizaron un percorrido polas zonas termais e coñeceron a Nova Unidade Terapéutica Termal, un espazo pioneiro orientado á prevención, recuperación funcional e coidado integral da saúde.
