A conselleira do Medio Rural, María José Gómez, puxo hoxe en valor en Castrelo de Miño o apoio da Xunta ao sector galego do viño, que se concreta, entre outras medidas, coas axudas para os investimentos en elaboración e comercialización de produtos vitivinícolas. A convocatoria deste ano para o exercicio de 2026 está aberta ata o próximo día 30 de xaneiro e conta cunha dotación orzamentaria de 5,5 millóns de euros.
Así o lembrou hoxe a conselleira na súa visita á adega Eduardo Rodríguez e Luz Cánovas, que recibiu o Acio de Ouro ao Mellor Viño Branco nas Catas de Galicia 2025, organizadas pola Xunta e os consellos reguladores vitivinícolas. Gómez estivo acompañada neste acto polo director xeral de Gandaría, Agricultura e Industrias Agroalimentarias, José Balseiros; o delegado territorial da Xunta en Ourense, Manuel Pardo; a presidenta do Consello Regulador da D.O. Ribeiro, Concha Iglesias, e o alcalde de Castrelo de Miño, Avelino Pazos.
A titular de Medio Rural sinalou que con estas subvencións preténdese mellorar o rendemento global das adegas, facilitar a adaptación ás demandas do mercado e impulsar a súa competitividade. Trátase, engadiu, dun apoio co que se financian investimentos materiais e inmateriais nas instalacións de transformación e nas infraestruturas vinícolas, como pode ser o caso de actuacións de eficiencia enerxética. Precisamente, esta adega foi beneficiaria en 2022 dunha destas axudas, coa que puido instalar paneis fotovoltaicos que cobren parte das súas necesidades de enerxía.
Por iso, aseverou Gómez, estas achegas son moi beneficiosas para as industrias do sector, como tamén o son aquelas destinadas á reestruturación e reconversión de viñedo ou para a promoción do viño galego en mercados de terceiros países. Este paquete de apoios, xunto con outras liñas, supoñerá en 2026 un esforzo orzamentario de ao redor de 12 millóns, destacou a conselleira, quen afirmou que a Xunta seguirá traballando de forma conxunta coas adegas e viticultores para garantir un futuro sostible, competitivo e de calidade para o rural.
Nesta mesma liña, Gómez puxo de relevo que o ámbito do viño aglutina en toda Galicia a máis de 10.000 viticultores e preto de medio milleiro de adegas que elaboran o seu produto baixo algún dos selos de calidade amparados polas cinco denominacións de orixe (DO) e outras tantas indicacións xeográficas protexidas (IXP). Uns indicativos que constitúen “unha mostra da variedade e diversidade deste sector en Galicia”, remarcou. Unha variedade que, tal e como sinalou, preténdese visibilizar tamén coa campaña de publicidade dos viños galegos que acaba de ser lanzada estes días.
A adega Eduardo Rodríguez e Luz Cánovas comezou a súa andaina en 2007, elaborando viños baixo a DO Ribeiro. Na actualidade, conta cunha plantación de viñedo de 10 hectáreas e comercializa catro viños, todos eles dentro desta denominación de orixe, cunha capacidade de produción de 56.000 quilos.
