O presidente provincial, na súa calidade de presidente da Sección de Vilas Termais da FEMP, defendeu que o termalismo “debe ser considerado unha cuestión de Estado”, integrada nas políticas públicas de saúde e reto demográfico
“Cada euro investido en termalismo non é un gasto, é unha inversión en saúde para os nosos maiores, en emprego para a mocidade e en futuro para os concellos”, concluíu, reivindicando que as Vilas Termais “non son pobos con auga, senón auténticos destinos de vida”
Caldes de Malavella, 5 de febreiro de 2026.
O presidente da Deputación de Ourense e presidente da Sección de Vilas Termais da Federación Española de Municipios e Provincias (FEMP), liderou a reunión do Consello de Goberno desta Rede, celebrada no Balneario Vichy Catalán de Caldes de Malavella (Xirona), onde puxo en valor o papel estratéxico do termalismo como ferramenta clave para o benestar, o desenvolvemento local e a loita contra a despoboación.
OS MELLORES ESTABLECEMENTOS
Durante a súa intervención, o presidente destacou que a Rede de Vilas Termais inicia o ano 2026 “nun momento de crecemento e consolidación”, con 76 entidades locais adheridas que representan a máis de 3,6 millóns de cidadáns en todo o Estado. “Non somos só unha sección administrativa da FEMP; somos unha ferramenta ao servizo da economía do coidado e unha oportunidade real para o mundo rural”, subliñou.
O máximo responsable das Vilas Termais da FEMP avanzou tamén a vontade de dar un paso decisivo na apertura da Rede, coa incorporación de socios colaboradores e observadores, co obxectivo de crear un ecosistema público-privado que permita reforzar a proxección do sector e o seu posicionamento estratéxico. Neste contexto, salientou a importancia de establecer alianzas con outras redes da FEMP e de impulsar colaboracións con organismos como o IMSERSO, para garantir que o termalismo chegue a todo o territorio e contribúa ao envellecemento activo da poboación.
No ámbito operativo, o presidente fixo referencia aos avances en materia de dixitalización e modernización da Rede, destacando a continuidade do Proxecto de Experiencias grazas a unha nova subvención de 100.000 euros ao abeiro do Real Decreto 1087/2025. “Seguimos avanzando cara a un modelo de xestión máis innovador, centrado na experiencia do usuario e na creación dunha marca sólida”, afirmou.
Outro dos eixos da intervención foi a necesidade de avanzar na seguridade xurídica do sector. O presidente incidiu na importancia do Grupo de Traballo Xurídico-Técnico, co obxectivo de avanzar cara a unha normativa estatal coherente e actualizada que dea estabilidade e recoñecemento ao termalismo.
No plano institucional, anunciouse que a próxima reunión do Consello de Goberno celebrarase en Alange (Badaxoz) e que a XIX Asemblea Xeral da Rede terá lugar en Archena (Murcia) no ano 2026, agradecendo o alto nivel das candidaturas presentadas por outras vilas termais.
Como peche, o presidente lanzou unha mensaxe clara: “O termalismo é emprego non deslocalizable; onde hai un manancial, hai unha oportunidade de vida”. Neste sentido, defendeu que o termalismo debe ser considerado “unha cuestión de Estado”, integrada nas políticas públicas de saúde e reto demográfico.
“Cada euro investido en termalismo non é un gasto, é unha inversión en saúde para os nosos maiores, en emprego para a mocidade e en futuro para os concellos”, concluíu, reivindicando que as Vilas Termais “non son pobos con auga, senón auténticos destinos de vida”.
