Os deputados do PP pola provincia de Ourense, Ana Vázquez, Rosa Quintana e Celso Delgado, asinan unha Proposición non de lei presentada no Congreso na que reclaman ao Goberno a cobertura, forma inmediata, das vacantes de persoal administrativo nas dependencias da Policía Nacional da provincia de Ourense. A iniciativa parlamentaria pon o foco na crítica situación que atravesan a Comisaría Provincial de Ourense, a Unidade de Estranxeiría e Documentación (UEYD) de Verín e a Unidade de Documentación do Barco de Valdeorras, “onde os policías vense na obriga de realizar tarefas administrativas ante a falta de funcionarios administrativos”, denuncia a deputada Ana Vázquez.
O texto da proposición denuncia un déficit estrutural de persoal funcionario dos corpos xerais (CCGG) que está a comprometer a seguridade cidadá. Actualmente, “as vacantes están a ser cubertas con axentes da Policía Nacional, o que supón detraer efectivos das súas funcións operativas para destinalos á expedición de DNI, pasaportes e trámites de estranxeiría”, explica a deputada.
Así, na Comisaría provincial situada na cidade de Ourense existe un déficit de cinco funcionarios, o que obriga a utilizar axentes operativos para tarefas de oficina e mesmo para o servizo rural a través do Vehículo Integral de Documentación (VIDOC).
Na unidade de Estranxeiría e Documentación (UEYD) de Verín hai tres vacantes de persoal administrativo, o que forza aos policías para asumir toda a carga de expedientes de cidadáns estranxeiros e protección internacional. Mesmo o catálogo de postos de traballo desta unidade reflicte unha dotación insuficiente para atender a actual carga de traballo, con só tres mandos e cinco axentes, coa conseguinte demora na atención á cidadanía.
Na Unidade de Documentación do Barco de Valdeorras a situación é aínda máis extrema, xa que os tres postos administrativos están vacantes, polo que os cinco policías destinados na unidade deben asumir integramente estas funcións. Esta unidade, creada en 2023, foi concibida para prestar servizo aos preto de 27.000 habitantes da comarca, “cuxa distancia e deficiente comunicación coa capital dificultan o acceso a estes servizos”.
Advirte Ana Vázquez que esta precariedade prodúcese nun momento crítico, ante a previsión dun incremento exponencial de traballo derivado da regularización masiva de inmigrantes anunciada polo Goberno para 2026. Estímase que este proceso afectará a máis de 4.000 persoas na provincia de Ourense e máis dun millón en España, concentrándose o traballo entre os meses de abril e xuño, o que podería xerar o colapso total destas oficinas se non se reforza o persoal de inmediato.
Ante este escenario, o Partido Popular esixe ao Executivo central a cobertura inmediata de vacantes, convocando en comisión de servizo voluntaria todas as prazas de corpos xerais vacantes en Ourense, Verín e O Barco ata a súa cobertura definitiva.
Reclaman ademais a revisión do catálogo en Verín, que non se actualiza desde 2007 e resulta insuficiente para a carga de traballo actual, así como converter a actual Unidade de Documentación do Barco de Valdeorras nunha Unidade de Estranxeiría e Documentación de pleno dereito, dotándoa dos medios necesarios para unha prestación integral de servizos.
Con esta iniciativa, o PP busca “garantir que os cidadáns da provincia de Ourense reciban unha atención adecuada e, fundamentalmente, que os axentes da Policía Nacional poidan dedicarse plenamente ás súas funcións de seguridade cidadá en lugar de cubrir carencias administrativas derivadas da falta de previsión do Goberno”, subliña Ana Vázquez.
