O Concello de Ribadavia e a Xunta de Galicia continúan avanzando na súa estratexia conxunta para fortalecer o comercio de proximidade, dinamizar o casco histórico e impulsar a actividade económica da vila a través do programa Vilas Vivas, unha iniciativa que este domingo, 2 de agosto, celebrará unha nova edición de ‘Domingo Vivo’, convertendo as rúas e prazas de Ribadavia nun espazo aberto para o lecer, o consumo responsable e a posta en valor dos produtos e empresas locais.
Esta acción enmárcase na aposta compartida entre ambas administracións por revitalizar os centros históricos galegos, favorecendo a creación de experiencias comerciais atractivas que contribúan a incrementar as vendas do pequeno comercio, atraer visitantes e reforzar a imaxe de Ribadavia como un destino de referencia no interior de Galicia.
A programación comezará ás 11,30 horas na Praza de San Xoán co sorteo da campaña Rasca e Gaña, unha iniciativa destinada a premiar a fidelidade da clientela dos establecementos participantes. Cada compra dá acceso a máis de 1.000 premios directos e á participación no sorteo mensual que se celebra o primeiro domingo de cada mes.
Ás 12,00 horas, a música da solista Marietta animará a Praza de San Xoán, mentres diferentes establecementos adheridos ao programa ofrecerán degustacións de viños do Ribeiro, cervexas artesanais e sidras. A actividade continuará ás 13,00 horas na Praza Maior coa actuación de Iago Vázquez, completando unha xornada deseñada para favorecer a afluencia de público ao centro histórico e dinamizar a actividade comercial.
As persoas asistentes poderán descubrir tamén a oferta das tendas integradas en Vilas Vivas: Sesentaeoito, O Escaparate, A Casa da Artesanía, O Colmado de Sabores, A Tahona no Camiño, O Recuncho do Birrán, Sarto e Soños, establecementos que representan a diversidade e calidade da oferta comercial de Ribadavia, combinando viños do Ribeiro, artesanía galega, gastronomía, moda e produtos de proximidade.
O alcalde de Ribadavia, César Fernández, destacou que “o comercio local é un dos grandes motores económicos e sociais da nosa vila e desde o Concello seguiremos impulsando todas aquelas iniciativas que contribúan a facelo máis competitivo e atractivo. O programa Vilas Vivas é un claro exemplo de como a colaboración entre o Concello de Ribadavia e a Xunta de Galicia permite desenvolver accións que repercuten directamente na economía local e na creación de oportunidades para os nosos comerciantes”.
O rexedor sinalou tamén que “non se trata unicamente de organizar actividades, senón de construír un modelo de vila viva durante todo o ano, no que patrimonio, cultura, turismo e comercio vaian da man. Queremos que quen visite Ribadavia descubra unha vila dinámica, con identidade propia e cun comercio que ofrece produtos singulares e unha atención diferenciada”.
Fernández quixo agradecer “o compromiso da Xunta de Galicia co desenvolvemento deste programa, así como a implicación dos comerciantes, adegas, artesáns e produtores locais, que son os verdadeiros protagonistas dunha iniciativa que contribúe a fortalecer o tecido económico de Ribadavia”.
A xornada completarase coas rutas guiadas incluídas na programación de Vilas Vivas, ofrecendo aos visitantes unha oportunidade para coñecer o patrimonio histórico e cultural da vila, complementando así unha proposta que combina promoción económica, turismo e valorización dos recursos locais.
