O Concello do Carballiño, a través da Concellería de Seguridade, vén de renovar o grupo semafórico do cruce das rúas Curros Enríquez e Rosalía de Castro. A actuación está enmarcada no proxecto de modernización dos semáforos con maior densidade de tráfico da vila e que tamén incluíu o grupo de sinais no cruce dos Catro Camiños.
“Trátase dunha medida moi necesaria para mellorar a seguridade vial e a accesibilidade dos peóns en puntos nos que se xuntan moitos vehículos e moitos viandantes”, explica Alberto Otero, edil de Seguridade. Ambas intervencións, moi demandadas pola poboación, supuxeron un investimento total de 80.000 euros.
A renovación de grupos semafóricos únese a outras medidas tomadas pola Concellería de Seguridade nos últimos meses para reforzar a seguridade vial do Carballiño, tales como o repintado de pasos de peóns en diferentes vías da vila.
