A Asociación Cultural Avantar distinguiu as Escolas Semente co premio Ernesto Atanasio “O Corcheiro” de 2026 pola súa “pedagoxía inclusiva e renovadora, co galego como lingua vehicular”. A gala de entrega celebrouse este sábado no salón de actos do casino do Carballiño.
Ao acto asistiu Santiago Quiroga, coordinador nacional das Escolas Semente, quen afirmou que recibir este galardón é “un orgullo e un sentimento de responsabilidade”. Quiroga explicou que a figura de Ernesto Atanasio está ligada a principios fundamentais do proxecto, como o compromiso coa lingua e a cultura galegas.
As Escolas Semente naceron en 2011 como unha agrupación sen ánimo de lucro para poñer en valor o galego ante a redución da súa presenza nas aulas desde 2010. O seu modelo educativo é multilingüe aditivo: partindo do galego, o alumnado coñece outros idiomas. O proxecto comezou cun único centro en Compostela e actualmente conta con cinco centros, máis de 140 alumnos e máis de medio milleiro de socias en todo o país. Segundo Quiroga, tras os primeiros anos de crecemento, a iniciativa atópase nunha fase de estabilización.
O coordinador agradeceu o apoio de Avantar e destacou que ambas as entidades comparten o obxectivo dunha Galicia coa lingua plenamente normalizada. Durante a gala tamén se recoñeceu o labor das organizacións e institucións participantes, así como a actuación dos músicos Marta Bravo e Sergio Tannus.
