A portavoz do grupo provincial do Partido Popular, Patricia Torres, puxo en valor o traballo realizado pola Deputación de Ourense durante a situación de emerxencia que viviu a nosa provincia polos incendios forestais, durante o debate político que tivo lugar hoxe no Pleno provincial celebrado con carácter extraordinario urxente.
A voceira popular dixo que o Goberno de España “non estivo á altura” ao igual que a oposición autonómica que “preferiu a foto e a pancarta antes que estar ao carón da xente e das institucións”, afirmando que os lumes só se apagan con “medios, coordinación e con compromiso real co territorio”.
Por elo, emprazou a todos os grupos políticos a “analizar e facer propostas para lograr cambios na materia”. Así mesmo, apelou a responsabilidade individual e colectiva e ao fomento dunha “silvicultura máis sustentable, coa plantación de especies autóctonas”.
Así mesmo, Patricia Torres instou á oposición a ser “máis serios e responsables” con esta situación e lembroulle ao BNG que no Parlamento votaron en contra da Lei de recuperación da terra. Polo que considerou que o debate deste asunto é “unha estratexia política da oposición” que só busca “titulares en plena emerxencia e iso non apaga lumes nin axuda á xente”.
A voceira popular recalcou que a pesar de contar co “mellor dispositivo de Europa” a virulencia dos incendios en montes ordenados e sen ordenar que “na maioría dos casos son provocados e calculados”, fixo “imposible” atender todos os lumes ao mesmo tempo. Por elo, o Partido Popular propuxo levar a cabo cambios necesarios cambios nas políticas forestais e de prevención porque “os incendios de hoxe non son os de hai 20 anos”. Cambios que segundo o PP deben facerse despois, con serenidade, “sentándonos cos técnicos, cos alcaldes, cos gandeiros, cos profesionais do monte, cos axentes e cos equipos de extinción para analizar e aprender do acontecido”.
Os concellos sinalados pola Fiscalía
A voceira popular destacou as dificultades técnicas e a falta de medios que sofren os municipios para poder lograr a limpeza das terras nos seus territorios e por iso chamou á “responsabilidade de propietarios” e a aplicar “ferramentas eficaces” para que os concellos poidan notificar e sancionar, así como que os montes de man común reinvistan os beneficios do monte no propio monte.
Neste sentido, denunciou a “inxusta” medida adoptada pola Fiscalía que acaba de anunciar investigacións para ver se os concellos tiñan ou non os plans de prevención ao día. “Con todas as dificultades que xa hai, aínda por riba pretenden sinalar aos alcaldes con responsabilidades penais. Iso é inxusto. Os concellos somos os primeiros en dar a cara cando hai lume, non podemos ser tratados como culpables dunha situación que nos supera”, afirmou.
Agradecemento ao traballo realizado durante os incendios
Ademais, Patricia Torres agradeceu, en nome de todo o PP de Ourense, aos bombeiros, brigadistas, servizo de emerxencias, pilotos de helicópteros e avións, UME, BRILAT, Garda Civil, Policía Autonómica, 061, GES, brigradas municipais e Cruz Vermella, alcaldes e voceiros municipais, á veciñanza, aos gandeiros, ás empresas privadas e aos voluntarios porque “todos eles fixeron posible o que parecía imposible. Grazas, de corazón, porque demostrastes que Ourense é unha terra solidaria e valente.”
