O Concello de Ribadavia abrirá este luns, 25 de maio, o prazo de solicitudes para participar no programa municipal “Concilia Verán 2026”, unha iniciativa destinada a facilitar a conciliación da vida familiar e laboral das familias durante o período estival, ao tempo que ofrece aos nenos e nenas unha alternativa de lecer educativo e saudable. O prazo permanecerá aberto ata o vindeiro 5 de xuño.
O programa desenvolverase entre o 22 de xuño e o 7 de setembro, de luns a venres e en horario de 09:00 a 14:00 horas, con posibilidade de solicitar servizo de conciliación de primeira hora desde as 08:30h. Está dirixido a nenos e nenas de entre 3 e 14 anos, nados entre os anos 2012 e 2022.
As actividades incluirán manualidades, xogos, actividades deportivas, piscina e propostas educativas adaptadas ás diferentes idades. Ademais, o grupo de maiores de 11 anos contará con programación específica, como rutas de sendeirismo e unha saída ao Parque Náutico de Castrelo de Miño para realizar actividades náuticas.
O Concello ofertará ata 135 prazas durante o mes de xullo, 115 en agosto e 90 tanto no período de xuño como no de setembro. No caso de que a demanda supere a oferta dispoñible, establecerase unha lista de agarda e aplicaranse criterios de prioridade relacionados coa situación laboral e familiar das persoas solicitantes.
OS MELLORES ESTABLECEMENTOS
As tarifas partirán dos 15 euros por quincena para persoas empadroadas, existindo descontos específicos para familias numerosas, monoparentais, menores con discapacidade e para o segundo irmán ou irmáns sucesivos. Tamén se poderá contratar o servizo completo para todo o verán ou o servizo de conciliación de primeira hora.
As solicitudes poderán presentarse de maneira telemática a través da sede electrónica do Concello, en ribadavia.sedelectronica.gal, ou presencialmente no Departamento de Servizos Sociais. A lista de admitidos publicarase o día 12 de xuño.
