O presidente da Deputación de Ourense e líder provincial do PP, Luis Menor, realizou unha valoración positiva do proxecto de orzamentos da Xunta de Galicia para 2027. Destacou a estabilidade e o rigor do Executivo galego ao presentalo “en tempo e forma” por décimo oitavo ano consecutivo, e sinalou que o eixo fundamental é responder ás prioridades reais da sociedade, cun forte peso das políticas de benestar: tres de cada catro euros destínanse ao ámbito social. Tamén subliñou as rebaixas fiscais para familias, empresas e acceso á vivenda.
En clave territorial, Menor indicou que Ourense é a provincia que máis recursos recibe por habitante (6.040 € por persoa). No ámbito sanitario e social, citou o esforzo investidor no Complexo Hospitalario de Ourense (CHUO), a mellora de hospitais comarcais e centros de saúde, a futura residencia de maiores financiada pola Fundación Amancio Ortega e os 58 millóns de euros destinados aos bonos de dependencia.
Así mesmo, referiuse ao impulso á vivenda pública, á creación de chan residencial e ás axudas á rehabilitación no rural; ás infraestruturas de mobilidade como a rolda este e o novo acceso ao CHUO; e á ampliación do polígono de San Cibrao con 9,7 millóns de euros. No educativo, mencionou os 11 millóns para o futuro instituto de Pereiro de Aguiar e a construción de novos centros. Tamén valorou o incremento de fondos para a prevención e defensa contra os incendios forestais, a recuperación de espazos naturais e as melloras en saneamento e depuración. Finalmente, destacou a “excelente sintonía institucional” e a colaboración da Deputación de Ourense coa Xunta en proxectos estratéxicos para o territorio.
