Aseguran que a vitivinicultura do Ribeiro está a atravesar momentos críticos. As perdas ocasionadas por fenómenos meteorolóxicos adversos, as crecentes dificultades para a exportación sumadas ás consecuencias da actual pandemia están a provocar, segundo manifesta o propio Consello Regulador, unha baixa incesante de adegas de colleiteiros, o abandono da metade das hectáreas cultivadas e a desaparición de dous terzos dos viticultores constatada na última revisión do rexistro vitícola da D.O..
Por estes motivos propoñen ao Pleno do Concello de Ribadavia demandar da Xunta de Galicia axudas económicas aos viticultores e ás adegas do Ribeiro, e por extensión de toda a comunidade autónoma galega, debido ás altas perdas que están a ocasionar as medidas de peche da hostalería. O impulso ás iniciativas que permitan diversificar a comercialización do Ribeiro e medidas que eviten unha maior destrución de emprego como moratorias nas cotas da seguridade social de persoas asalariadas e autónomas.
