Nota de Badal: A foto é de arquivo
O PSDEG-PSOE CUESTIONA QUE BALTAR REPARTA A DEDO EN PLENA ALERTA SANITARIA FONDOS DA DEPUTACIÓN PARA OBRAS NON PRIORITARIAS ENTRE CONCELLOS AFÍNS
“Estes cartos poderían servir para paliar as consecuencias derivadas da actual situación de alerta”, recalca Villarino antes de reclamar ó bipartito de PP e DO que “poña fin de inmediato a estas prácticas”
A xunta de goberno aprobou centos de miles de euros a municipios como Muíños, A Veiga ou Porqueira para actuacións que os socialistas non consideran “prioritarias neste momento” como asfaltado
O PSdeG-PSOE cuestiona que Manuel Baltar manteña, en plena alerta sanitaria, o seu reparto a dedo de fondos públicos da Deputación de Ourense, exclusivamente entre concellos gobernados polos seus alcaldes afíns. A última xunta de goberno da institución provincial acaba de adxudicar centos de miles de euros en subvencións directas a municipios como Muíños, A Veiga ou Porqueira para actuacións que os socialistas non consideran “prioritarias neste momento” como asfaltado ou iluminación pública.
“O sistema caciquil e decimonónico co que a Deputación reparte os fondos públicos como se fose un sultanato segue en plena alerta sanitaria”, denuncia o voceiro, Rafa Villarino quen salienta, una vez máis, que “estamos ante un evidente agravio para os veciños e veciñas de concellos onde non gobernan os amigos do presidente, que se adica a repartir a meirande parte dos cartos públicos a dedo e sen criterios de equidade”. “Estes cartos poderían servir para paliar as consecuencias derivadas da actual situación de alerta”, recalca antes de reclamar ó bipartito provincial de PP e DO que “poña fin de inmediato a estas prácticas” e “centre os seus esforzos en prestar asistencia e cooperación ós concellos da provincia en asuntos de primeira necesidade como son os servizos de asistencia social, limpeza ou servizos económicos”.
O principal obxecto da deputación, así estipulado na lei, é adicar as súas actuacións e recursos “á cooperación cos concellos e garantir uns servizos municipais de calidade para todos os cidadáns en condición de equidade”, algo que debería ser “máis primordial que nunca” neste momento. Os socialistas destacan como, por exemplo, ó longo do pasado 2019, Muíños recibiu 248.000 euros da Deputación (165 por habitante) e a Veiga 309.000 (347 euros por habitante), fronte a outros municipios non gobernados polo PP como Allariz (36 euros por habitante) ou O Barco de Valdeorras (12 euros por habitante).
