SOBRE AS CUESTIÓNS DEBATIDAS NO PLENO EXTRAORDINARIO DE HOXE
Para hoxe convocárase un pleno extraordinario con dous puntos na orde do día.
Porén, ambos puntos quedaron sen votar. O BNG ía votar abstención no punto 1 e a favor no punto 2. Lamentamos que os asuntos sigan pendentes enriba da mesa, o BNG mantivo e manterá unha actitude de man tendida e acudirá a todas as xuntanzas que se volvan producir, pero os grupos maioritarios da corporación teñen que asumir a súa responsabilidade e o noso concello ten que avanzar.
En todo caso, manifestamos publicamente a nosa valoración do que inicialmente se ía tratar e votar:
No primeiro punto, unha modificación do orzamento municipal para dispor 100.000 euros destinados a unha orde se subvencións a autónomos e pemes.
Seguimos a valorar que esta medida que propón o goberno municipal é insuficiente, en canto aos fondos asignados e tamén en canto aos colectivos amparados.
O BNG non está en contra da aprobación destas axudas e tendo en conta a tramitación administrativa necesaria en cada subvención pública é necesario avanzar para que os fondos cheguen a tempo de paliar os graves menoscabos económicos que se están a producir.
Pero non se trata do plan que realmente necesita Ribadavia, temos moi presente que unha de cada tres persoas que queren traballar están nestes momentos ou nun ERTE e directamente no paro. A nosa economía local non se vai recuperar se non hai xente que poida consumir os seus produtos. A precariedade non axuda a que a xente viva nin compre en Ribadavia, polo tanto, como xa vimos insistindo é urxente a aprobación dun plan de emprego dirixido ás persoas que están no paro e dun plan extraordinario de emerxencia social que lle garanta uns mínimos de vida a toda a cidadanía.
Os fondos municipais, se ben se poden ampliar máis alá dos 100.000 euros dispoñibles dende hoxe, non son suficientes. A Deputación provincial ten a obriga de colaborar cos concellos, e dispón de 85 millóns de euros e unha marxe de actuación respecto a circunstancias extraordinarias moito maior ca dos concellos coma o de Ribadavia. Os alcaldes, coma o noso, teñen que escoller entre a pleitesía que que permite a Baltar gastar os cartos de todos como lle ven en gana e a defensa da súa veciñanza, da xente de Ribadavia.
A portavoz municipal do BNG, Maite Rodríguez reiterou as propostas realizadas na xunta de portavoces celebrada o pasado martes 5 de maio:
– que non só se produza unha axuda económica directa a persoas autónomas e pequenas e medianas empresas (pemes) se non tamén unha desgravación de taxas e impostos cuxo cobro non estaría xustificado debido á baixada de actividade: taxas de recollida do lixo, de ocupación do espazo público con terrazas
– que se reduza o máximo de renda de 40.000 € para as persoas beneficiarias
– que se reduza o umbral de descenso de actividade, do 75% ao 50%
– que se acorde un plan de emerxencia social dirixido ás familias de risco de exclusión social, ás persoas maiores dependentes ou que viven soas, estudantes e persoas discapacitadas
– que se acorde un plan de emprego e formación laboral, con medidas coma o reforzo do persoal dos servizos de atención social, para atender aos colectivos máis vulnerables e un reforzo do persoal municipal dedicado ás obras e a rehabilitación de espazos públicos
– que a Deputación apoie con partidas específicas estes plans municipais
É fundamental e urxente, que dende o Concello se elabore un plan de reactivación económica de Ribadavia, con investimentos públicos e privados, que impulse o mantemento de comercios, empresas e emprego no noso concello.
En canto ao segundo punto da orde do día, tratábase dun convenio entre o noso Concello e a Confederación Hidrográfica para a renovación das canalizacións do abastecemento municipal de augas en San Cristovo, previsto para a súa execución en 2021.
