Educación licita por 1 millón de euros a rehabilitación integral do edificio Abrente do Ies O Ribeiro (Ribadavia)

  • O obxectivo é iniciar as obras durante o verán e compatibilizalas co curso escolar baixo as máximas medidas de seguridade

A Consellería de Educación, Universidade e Formación Profesional vén de publicar na plataforma Contratos de Galicia a licitación da obra de rehabilitación integral do edificio Abrente do IES O Ribeiro (Ribadavia), por importe de 1.006.916,24 €.

Publicidade

No referido á mellora da eficiencia enerxética, a actuación contempla a substitución das fiestras por outras de carpintería de aluminio con rotura de ponte térmica e vidro dobre baixo emisivo. Tamén se renovarán as persianas, que se colocarán de aluminio con illante térmico interior; e instalaranse novas luminarias con tecnoloxía LED. Así mesmo, está previsto cambiar a cuberta actual por tella curva.

Por outra banda, a rehabilitación inclúe a colocación de novos teitos acústicos en aulas e zonas comúns, o reforzo do sistema de calefacción, o pintado de paramentos interiores e exteriores, a limpeza de fachadas, o pulido e abrillantado do pavimento de terrazo existente e a adecuación dun espazo para aula de cociña.

A maiores, mellorarase a accesibilidade ao centro mediante a instalación dun ascensor que dote de accesibilidade a todas as plantas, así como de aseos adaptados.

O obxectivo é iniciar as obras no centro durante o verán e compatibilizalas a partir de setembro co curso escolar, sempre baixo as máximas medidas de seguridade. Os traballos teñen un prazo de execución de 3 meses.