O Delegado da Xunta en Ourense visita o cluster da pizarra

O delegado territorial da Xunta en Ourense, Gabriel Alén, mantivo esta mañá unha reunión co presidente do Clúster da Pizarra de Galicia, Víctor Cobo. O representante do Goberno galego, que está a manter unha rolda de contactos cos distintos axentes económicos e sociais da provincia, achegouse á comarca de Valdeorras para coñecer de primeira man o estado e as necesidades deste sector produtivo tan importante na provincia e en Galicia.

Acompañado da alcaldesa de Carballeda de Valdeorras, María del Carmen Gonzaléz, visitou as instalacións do Centro Tecnolóxico da Pizarra, onde o agardaban o presidente do Clúster da Pizarra, Victor Cobo, e representantes de empresas do sector. Durante máis de hora e media, e delegado territorial da Xunta escoitou os pareceres e suxestións deste colectivo empresarial e transmitiulle o aval e o apoio do Goberno galego ás novas iniciativas que teñen previsto de cara ao futuro e que fomenten o desenvolvemento dunha minería sostible.

AVANTAR ACTIVIDADES

Gabriel Alén, lembroulle os compromisos xa adquiridos con este sector polo presidente da Xunta na súa visita o pasado 14 de febreiro, e resaltou “o labor deste colectivo empresarial a prol da dinamización do rural, e a contribución da lousa como unha aposta permanente pola innovación”.

O delegado territorial salientou a importancia deste sector estratéxico para a comarca de Valdeorras, converténdose na principal fonte de actividade económica da zona. Así, a lousa dá emprego directo a preto de 2.500 traballadores e de maneira indirecta a arredor de 10.000 persoas, representando o 26% do produto interior bruto da comarca.

Nesta liña, Gabriel Alén lembrou que o 33% da produción mundial da lousa para cubertas procede da Comunidade galega, tendo como principais países destinatarios a Francia (101 millóns de euros) e ao Reino Unido (68 millóns de euros).