Galicia vén de rexistrar o seu máximo histórico de Agrupacións de Voluntarios de Protección Civil (AVPC), ao acadar as 234 entidades activas
- Entre os anos 2015 e 2019 a Xunta de Galicia investiu na adquisición de medios de emerxencias aos concellos para a súa utilización polas AVPC ou servizos de emerxencia municipal algo mais de 12 millóns de euros en toda Galicia e de case que 3.5 millóns de euros na provincia de Ourense
- O delegado territorial destacou “o traballo altruísta dos voluntarios e voluntarias de protección civil, que nos derradeiros meses realizaron preto de 60 mil operativos na provincia de Ourense”
- Gabriel Alén subliñou que “a Xunta traballa pola potenciación destes grupos, procurándolles non só unha dotación de medios senón tamén unha ampla formación do voluntariado”
O delegado territorial da Xunta en Ourense, Gabriel Alén, reuniuse está maña co presidente das Agrupacións de Voluntarios de Protección Civil, Clemente Pérez, para agradecerlle o intenso labor deste colectivo desenvolvido durante esta pandemia.
O delegado territorial destacou “o traballo altruísta dos voluntarios e voluntarias de protección civil, que nos derradeiros meses realizaron preto de 60.000 operativos na provincia de Ourense”. Así, fixeron actuacións en distintos ámbitos como o reparto de alimentos e medicamentos a persoas en situación de vulnerabilidade, a limpezas e desinfeccións externas en lugares sensibles ou de pública concorrencia dos concellos ou a execución de avisos e información á poboación durante o confinamento. Tamén, dende que principiou a pandemia, prestaron apoio loxístico a medios de intervención, colaboraron no desenvolvemento das eleccións autonómicas e axudaron na campaña da vacinación da gripe.
Gabriel Alén puxo en valor o traballo que realizan as agrupacións “como reforzo dos servizos de emerxencias, especialmente en actividades de prevención, colaboración e incluso de intervención no suceso ou accidente”. Neste senso, o representante provincial do Goberno galego subliñou que “a Xunta traballa pola potenciación destes grupos, procurándolles non só unha dotación de medios senón tamén unha ampla formación do voluntariado”; resaltando que “a administración autonómica fixo nos últimos anos un importante esforzo económico na compra de equipamentos de emerxencias”.
Adquisición de material
Asociación Provincial de Agrupacións de Protección Civil investirá este ano o importe íntegro do convenio subscrito coa Xunta de Galicia para a promoción das Agrupacións de Voluntarios de Protección Civil de Galicia, na compra de material sanitario e desinfección, que será repartido entre todos os membros. Deste xeito, os 6.000 euros aos que ascende o convenio foron destinados a compra de 152 litros de desinfectante hidroalcólico, 104 buzos de protección, 48 botas, 39 gafas, 37 máscaras e 53 pares de luvas.
O presidente, Clemente Pérez, destacou “o gran traballo que levan feito as agrupacións ao longo destes anos, e especialmente nestes difíciles meses da pandemia, tratando de contribuír con esta aportación de material, a operatividade das mesmas e poder continuar ofrecendo un gran servizo á cidadanía”
Entre os anos 2015 e 2019 a Xunta de Galicia investiu na adquisición de medios de emerxencias aos concellos para a súa utilización polas AVPC ou servizos de emerxencia municipal, creando unhas liñas de subvencións en especie, que nesta provincia supuxeron a adxudicación de 41 vehículos pick up, 13 furgóns de loxística, 46 remolques de emerxencia, embarcacións pneumáticas, remolques con carpas para as emerxencias e esparexadores de sal e equipos de excarceración, etc. Un investimento total de algo mais de 12 millóns de euros en toda Galicia e de case que 3.5 millóns de euros na provincia de Ourense. A este total hai que engadir 3 vehículos pick up, 2 remolques de emerxencias, 9 coitelas quita neves, 8 esparexadores de sal e 5 tendas para emerxencias que recentemente se acaban de adxudicar, e que corresponden a subvención de equipamentos de emerxencias a concellos de menos de 50.000 habitantes, mancomunidades ou agrupacións de concellos galegos, co financiados polo Fondo FEDER para este ano 2020.
Galicia vén de rexistrar, hai uns días, o seu máximo histórico de Agrupacións de Voluntarios de Protección Civil (AVPC), ao acadar as 234 entidades activas. O que ben a remarcar o bo momento polo que pasa a Protección Civil en Galicia. Incorporándose neste 2020 na provincia de Ourense 2 novas Agrupacións de Voluntarios as AVPC de Melón, que se reactivou, e a recentemente creada no concello de Maside.
