O departamento de Servizos Sociais do Carballiño, a Mancomunidade, a Xunta e a Universidade de Santiago de Compostela elaboraron un estudo entre preto de mil rapaces da ESO, Bacharelato e FP para a creación dun Plan de Prevención de Adicións.

Publicidade

O presidente da Macomunidade, Manuel Cerdeira, destacou a importancia deste estudo despois de vivir unha época de confinamento, na que moitas adicións se acrecentaron.

Inés Meizoso, psicóloga do Servizo Prevención de condutas aditivas, explicou os diferentes tipos de adicións existentes e da mellor forma de facerlles fronte. 

Antonio Rial Boubeta, profesor titular da USC fixo unha valoración sobre a situación das adicións e das chaves para atallalas.

Os resultados amosan que no Carballiño, o consumo de alcohol é inferior ós datos de España e de Galicia, aínda que é a droga máis recorrente; a idade do consumo de alcohol é de media os 13 anos, e de aí en adiante incorpóranse outras sustancias. O botellón segue vixente, aínda que menos ca antes e a percepción de risco neste consumo é claramente baixa, un dato preocupante.

En canto a outro tipo de adicións, o 12% fixo algunha vez sexting activo, e unha porcentaxe similar sifriu presións para facelo. Sobre o 30% dos mozos comezarían a estar desenvolvendo un problema co uso da rede e os videoxogos constitúen unha das principais fontes de lecer, cun 2% dos mozos presentando síntomas de adición. Un 25% manifesta haber apostado diñeiro en calquera das diferentes formas e xogo e un 2% presenta síntomas de ter problemas co xogo.