Nota de prensa Mostra Internacional de Teatro de Ribadavia

A MIT 2021 fará pública toda a súa actividade na rolda de prensa de presentación do programa da 37ª edición o vindeiro martes día 29 de xuño ás 12h, nun acto dende Ribadavia que se poderá seguir en directo nas canles oficiais das redes sociais do festival.

            Entre as actividades, terán especial relevancia todas aquelas relacionadas coa dramaturxia actual e o apoio ás creadoras e creadores contemporáneos.

AVANTAR ACTIVIDADES

            Neste sentido, a MIT anuncia unha das actividades paralelas que se suman ao estímulo da dramaturxia galega, como é o xa veterano Premio Abrente de Textos Teatrais.

O 16º PREMIO ABRENTE dará a coñecer a obra premiada no contexto da MIT 2021, entre o 16 e o 25 de xullo, unha nova edición do Premio de Textos Teatrais que leva o nome da Asociación que sinalou a Ribadavia no camiño do teatro en tempos de dificultades e que alentou a escrita e a representación na nosa lingua. Formarán parte do xurado desta edición  Rocío González, actriz, José Luis Baños de Cos, dramaturgo e Premio Abrente 2019 e Anna R. Figueiredo, escritora e vicepresidenta da AELG.

            DraMITurga. DramaturGA (Asociación Galega de Dramaturxia) e a MIT Ribadavia organizan draMITurga, unha explosión de forza centrífuga que impulsa, expande e visibiliza a nai das artes escénicas: a dramaturxia. A enxeñaría que está na base do teatro, do circo, da danza e doutras modalidades performativas e das súas mestizaxes, pasa agora a primeiro plano con esta proposta. Unha idea de Ricardo Cabaça, secundada e coidada por Afonso Becerra de Becerreá, Ernesto Is e Zé Paredes.

            6 dramaturgas/os, 3 de Portugal e 3 de Galiza, van a escribir cadansúa peza breve orixinal para esta ocasión. A partir desas 6 pezas breves orixinais poñerase en marcha draMITurga, que consiste nun xogo no cal cada unha das 6 dramaturgas fará unha rescrita de cada unha das pezas das súas colegas. Isto xerará unha multiplicación de versións e rescritas que dará un resultado de 36 pezas breves. Un xogo de espellos e contaminacións, de disfraces e espidos, a través do cal esas 6 primeiras pezas breves orixinais se van converter noutras.

            draMITurga anima, deste xeito, non só a creación contemporánea, senón tamén as conexións entre poéticas, estéticas e voces diferentes, dentro do eixo atlántico galego-portugués. Ademais, o xogo de rescritas pon en foco un dos elementos fundamentais das artes escénicas e mesmo da propia vida, se callar por iso ás escénicas se lles chama tamén artes vivas: a mudanza. Pezas orixinais que van mudando ao pasar por distintas mans.

O show draMITurga

            A última rescrita farase, in situ, na MIT Ribadavia e abrirase ao público nun show especial. Farase unha presentación das derradeiras rescritas por parte do alumnado da Escola Municipal de Teatro de Ribadavia e sen ofrecer a identidade de quen as realizou. Cada persoa do público emitirá un voto secreto respecto á peza que máis lle guste e interese. Entón, da peza elixida procederase a presentar todas as súas versións até chegar á peza orixinal, como nunha viaxe alucinóxena, que nos levará por diferentes voces, estilos, poéticas e, incluso, sorpresas. draMITurga, a dramaturxia patas arriba!

Dramaturgos galegos: Roi Vidal, Carlos Labraña e Ze Paredes.

Dramaturgos portugueses: Ricardo Cabaça, Ivo Saraiva e Silva e Mariana Ferreira.

Lectura das pezas e votación do público: 25 de xullo, 12h00, Igrexa da Madalena