A Federación de Servizos á Cidadanía de CCOO de Ourense onde se integra o Sector Ferroviario, mantivo unha xuntanza co Alcalde do Carballiño para abordar os problemas máis importantes que hai actualmente no ferrocarril na provincia.
Na reunión falouse das deficiencias e abandono do servizo e das circulacións ferroviarias por escaseza e mala frecuencia, o cal impide ós veciños e veciñas da Comarca do Carballiño ter un servizo público sostible e social para a súa mobilidade dentro das vilas e núcleos rurais cas diferentes capitais Galegas, o que contribúe ao despoboamento da zona rural.
Sindicato e alcalde acordaron reclamar conxuntamente a reapertura da estación do Carballiño con servizo de venta presencial, xa que as máquinas auto-venda instaladas por Renfe só permiten a venda do tren Rexional e o pago con tarxeta o que aumenta a dificultade de acceso e compra aos veciños, ademais da falta de información que precisan para adquisicións de billetes, cambios, anulacións e programacións de viaxes en tren.
Tamén se acordou que o goberno municipal reclame e xestione coas administracións a reposición do 100 % das frecuencias existentes antes da pandemia, xa que actualmente só circulan 2 das 7 frecuencias que prestaban servizo na liña do Carballiño, deixándoa nunha situación de abandono absoluto.
Por último, tamén se falou da necesidade de máis frecuencias e modificacións horarias que repercutan nunha maior utilidade e aproveitamento do Servicio Público para os veciños e veciñas do Carballiño e demais núcleos rurais dos arredores. Adecuando as frecuencias ferroviarias ás entradas e saídas dos centros de traballo e educativos,e tamén para enlaces con outros trens ou medios de transporte, aproveitando que a Comisión Europea declarou o 2021 como o “Ano do ferrocarril”, o que vai supoñer mais inversións neste medio de transporte e a Galicia rural non pode quedar ao marxe.
