Nota informativa da CEO: “A construción do futuro xa é presente”

Unha sesión telemática organizada por ACO e CEO pon de relevo a necesidade de avanzar nas pautas de construción actuais cara a novos parámetros e materiais máis sostibles, eficaces e económicos

Publicidade

A construción do futuro xa é presente

 A empresa chinesa que levantou un edificio en pouco máis dun día, participa nesta xornada o próximo 15 de setembro
 Representantes de Broad Group falarán da tecnoloxía e a innovación nos procesos construtivos
 O ‘edificio vivente’ está composto de módulos ensamblados e conectados entre si, 10 veces máis lixeiros e, á vez, 10 veces máis resistentes que os inmobles convencionais
 A esta tecnoloxía modular a empresa incorpora placas sostibles de fácil montaxe para a súa construción

Novas tecnoloxías e materiais, eficiencia, sustentabilidade e un prezo máis alcanzable son os retos da construción para esta etapa de tantos cambios. Conscientes desta nova dirección cara á que transita esta actividade, a asociación provincial de construtores ( ACO) e a Confederación Empresarial de Ourense organizaron unha xornada para abordar o tema da ‘Tecnoloxía e innovación en procesos de construción: edificios sustentables modulares e con novos materiais’.

Á vangarda desta transformación sitúase a empresa chinesa Broad Group que levantou recentemente un edificio de 10 plantas en 29 horas e cuxos representantes serán os encargados de participar na charla planificada por ambas as organizacións. O obxectivo desta firma asiática é manter unha reunión de traballo con representantes da Confederación, tecido empresarial e asociacións interesadas nas posibilidades de importar a España e Europa a tecnoloxía utilizada nesta fazaña construtiva. Para iso, o 15 de setembro manterán unha reunión virtual na que explicarán estas tendencias e as posibilidades de trasladar e implantar aquí este tipo de construción. A sesión contará con tradución simultánea entre os dous idiomas.

A estrutura lograda por esta empresa chinesa, denominada ‘edificio vivente’, pesa 10 veces menos que os edificios convencionais e, aínda así, a súa resistencia é 10 veces maior. Para a súa construción empregaron módulos prefabricados que foron superpostos e ensamblados conectándoos entre si. No seu ciclo de vida (estimado nuns mil anos) este edificio realiza un baixo consumo de enerxía mediante renovables, e o custo de construción e transporte é cinco veces menor que o dun inmoble habitual.