O PP reitera a súa petición de dar 5.000 euros para as necesidades das ANPAS

O grupo municipal do Partido Popular de Ribadavia presentará novamente ao Pleno de outubro a moción para solicitar ao goberno municipal que leve a cabo unha modificación de crédito, con carácter urxente, por importe de 5000€ destinada a establecer unha liña de subvencións ás ANPAS do Concello de Ribadavia. Os populares vense na obriga de volver a presentar esta proposta despois de que no pleno de setembro o goberno municipal de PSOE e ReC votasen en contra da urxencia da moción e bloquearan, dese xeito, a posibilidade de debater a cuestión e habilitar esa liña de subvencións ás ANPAS dos centros educativos de Ribadavia.

Publicidade

Para os populares é moi importante habilitar esta liña de axudas xa que son moitas e diversas as necesidades que as ANPAS teñen para contribuír, dentro das súas competencias, a mellorar as condicións dos servizos educativos no concello de Ribadavia. Neste sentido, os populares afirman que o concello debe colaborar coas asociacións de Nais e Pais de Ribadavia a través dunha liña de axudas económicas que permitan ás ANPAS a adquisición de materiais, programación de actividades ou calquera outra cuestión que redunde na mellora das condicións nas que se prestan os servizos educativos no Concello de Ribadavia.

Por todo isto, o Partido Popular de Ribadavia volverá a pedir ao Pleno municipal que se leve a cabo unha modificación de crédito por importe de 5000€ destinada a establecer unha liña de subvencións ás ANPAS do Concello de Ribadavia, de xeito que unha vez aprobada a modificación se suscriban convenios individuais con cada ANPA para atender de xeito particular ás necesidades de cada unha das asociacións de nais e pais dos centros educativos de Ribadavia. Os populares agardan que desta volta, ao presentarse pola vía ordinaria e non por urxencia, o goberno municipal non bloquee a concesión desta liña de axudas ás ANPAS de Ribadavia.

Os populares consideran incomprensible que PSOE e ReC votaran en contra da urxencia da proposta cando eles mesmos coma grupos teñen levado a pleno pola vía de urxencia propostas do mais diverso e que, dende logo, moitas delas non eran urxentes e que sin embargo ninguén bloqueou. Os populares lembran que existía un acordo tácito entre todos os grupos dende hai tempo para non rexeitar a urxencia de ningunha proposta, un acordo que agora os grupos de PSOE e ReC decidiron saltarse para impedir que se debatera unha moción presentada polo grupo popular. Finalmente, dende o grupo popular queremos agradecer ao BNG que votara a favor da urxencia da proposta e que se mostraran dispostos tamén a apoiar o contido da moción.