En tempos nos que as administracións deben apostar pola facilidade para que calquer cidadán obteña a información que precisa, O Carballiño segue a xogar á opacidade absoluta.
O incumprimento das diferentes leis neste sentido, implican unha grave falla de respecto pola propia institución e unha sospeita permanente de intereses espúreos.
MOCIÓN PARA A QUE SE CUMPLA A LEI NA TRANSPARENCIA DAS CONTRATACIÓNS MUNICIPAIS
EXPOSICIÓN DE MOTIVOS
As distintas actualizacións lexislativas levadas a termo nos últimos anos, inciden moi especialmente na necesidade de fomentar a transparencia na xestión das administracións públicas.
As leis de procedemento administrativo, a Lei de Contratos do Sector Público (en adiante LCSP) e calesquera outras que se consulten exixen que se fomenten as facilidades para que tódolos cidadáns poidan coñecer en tempo real como xestionan as insititucións os seus recursos.
Como é habitual, o Concello do Carballiño brila pola súa opacidade. Faise moi difícil facer un seguimento de todo aquelo que non sexa procedementos abertos que son os únicos que se publican e ás veces aínda así non é sinxelo.
Esta administración ten unha entidade importante e como tal debera comportarse. Sen embargo, atopámonos con un flagrante e constante incumprimento do estipulado no artigo 63 da LCSP, que específica dende 2017 que datos e que información ten que publicarse no Perfil do Contratante do Concello aloxado na web municipal.
Non hai un só dato sobre os contratos menores, non se publica a meirande parte da información dos procedementos, non se da conta de alegacións, reclamacións e modificacións…
En fín, que a sensación é de que ao goberno actual o da transparencia preocupalle moito, preocupalle moito non tela.
Nos tempos de internet, das ferramentas de participación, da transparencia, O Carballiño deambula polos anos escuros da xestión caprichosa e pouco clara.
Ao noso entender, resulta inaceptable na primeira vila da provincia e cabeceira de comarca, que debera ser exemplo de modernidade, de legalidade, e que semella, sen embargo, máis camiño de asemellarse a algún concello que xa está camiño de desaparecer do mapa.
Visto todo o anteriormente comentado,
SOLICITAMOS
- Que o Concello do Carballiño cumpla escrupulosamente coa transparencia na xestión dos contratos e nomeadamente que se siga ao pé da letra o artigo 63 da Lei do Contratos do Sector Público.
