A Xunta de Galicia mantén aberto ata o vindeiro 8 de abril o prazo de solicitude de matrícula nas escolas infantís públicas autonómicas. As nais e pais poderán formalizar a solicitude ao longo desta semana nunha das máis de 10.000 prazas dos centros que forman parte da rede autonómica.
As familias non terán que pagar nada pola atención educativa dos seus fillos no vindeiro curso, que será o primeiro no que será 100% gratuíto para todas as nenas e nenos de 0 a 3 anos. Non será necesario realizar ningún trámite adicional para beneficiarse da gratuidade, medida que xa se aplica aos segundos e sucesivos fillos desde abril de 2020.
Toda a información sobre os trámites a seguir para solicitar praza, os requisitos e a documentación necesaria e os formularios correspondentes están dispoñibles tanto no DOG do 16 de marzo como na páxina web da Consellería de Política Social.
