A biblioteca da Xunta en Ourense súmase en maio á celebración das letras galegas

IES CHAMOSO LAMAS
  • Haberá actividades centradas na figura homenaxeada este ano, Florencio Delgado Gurriarán, e mostras con volumes en galego
  • Conmemórase tamén o Día da Banda Deseñada, con visitas guiadas á comicteca mañá martes e o mércores
  • O escultor Javier Bello Souto protagonizará o espazo CreOu con ‘Oficios invisibles de mulleres rurais galegas’

A Biblioteca Pública da Xunta en Ourense Nós súmase en maio á celebración das Letras Galegas con actividades para público infantil e adulto arredor do autor homenaxeado este ano, o poeta valdeorrés Florencio Delgado Gurriarán, e mostras bibliográficas. O Día da Banda Deseñada e o Día dos Museos son outras das conmemoracións do mes incluídas na axenda do espazo bibliotecario, que conta tamén coas habituais sesións de contos e obradoiros para público infantil, entre outras propostas. A información sobre o contido e participación en todas elas pode consultarse na web do centro.

Así, co gallo do Día das Letras Galegas, a rapazada de seis a 12 anos achegarase á figura de Florencio Delgado Gurriarán o luns 16, con María Lires e o obradoiro de ilustración Versos, cores e colaxes. Pola súa banda, o público adulto farao na xornada do 18 coa presentación do libro Florencio Delgado Gurriarán. Nosa Galicia é máis que toda a Terra, da man dos seus autores, Xosé Ramón Campos e Tania Pérez Pérez.

OFERTA DE TRABALLO EN AVIÓN

Completan as actividades arredor desta data dúas mostras. Unha delas estará na sala infantil, cunha selección de títulos en galego de todas as materias e para todas as idades, para visualizar a presenza do idioma en todos os ámbitos. A outra propón unha Cita a cegas coas letras galegass, con obras escritas en galego para levar en préstamo envoltas de xeito que non se identifiquen.   

Visitas guiadas á comicteca

Á marxe desta conmemoración, nestes comezo do mes celébrase o Día da Banda Deseñada e ofreceranse visitas guiadas á comicteca mañá martes pola mañá e o mércores pola tarde. O obxectivo é animar ao seu uso ás persoas usuarias non familiarizadas co cómic, cunha breve explicación sobre os tipos e a organización dos volumes dispoñibles.

A iniciativa enmárcase na programación para público adulto, que inclúe tamén dúas presentacións de publicacións. Na xornada do 26, o autor ourensán Javier Rodríguez González dará a coñecer o seu poemario Corredora de fondo, merecedor do Premio Internacional de Poesía Miguel Hernández-Comunidad Valenciana 2021. Por último, Óscar Vázquez Lima e Teresa Chamorro Álvarez presentarán Tu huella en mi camino o martes 31.

Canto á programación infantil, as actividades arrancan mañá cunha nova sesión de Contiños con Susana, desenvolvidas todos os martes para cativada de catro a seis anos. Ao día seguinte, chega a primeira das propostas de Os mércores son tardes de biblioteca, para rapazada de sete a doce anos, co obradoiro bilingüe en galego e lingua de signos Signos que contan, con Fátima Fernández e Mª Luísa Lombardero. Os restantes mércores do mes haberá obradoiros para achegarse á cultura de xeito lúdico da man de Xeitura, con Voces femininas o día 11, Museos do mundo, o 18, no marco do Día dos Museos, e Ourensás, o 25.

Pola súa banda, os bebés de ata tres anos poderán gozar de contos e cancións os xoves 12 e 26, con A pitiña Cocoricoricoricó, a cargo de Charo Pita, e Nano canta croc, con Raquel Queizás.

Espazo CreOu

O espazo dedicado a creadores e creadoras ourensáns CreOu terá como protagonista en maio e xuño o escultor Javier Bello Souto, veciño de Ribadavia e formado na Escola de Arte Pablo Picasso. A súa mostra Oficios invisibles de mulleres rurais galegas componse de pezas que representan os distintos traballos tradicionais reservados ás mulleres, baixo un enfoque crítico e de xénero. Permanecerá do 20 de maio ao 30 de xuño.

Cómpre sinalar que ao longo de maio continúa a exposición Eu son UVigo, organizada en colaboración coa Universidade de Vigo que buscar darlles visibilidade ás persoas egresadas ou que actualmente traballan nela e conseguiron os seus soños profesionais. O obxectivo é poñer en valor todos os ámbitos de coñecemento, a figura da muller como profesional de prestixio no campo universitario e ilusionar con respecto a cursar estudos superiores. Permanecerá ata finais de xuño.

Tamén se mantén ata o día 21 Pobre Asunción!, mostra arredor do tratamento da violencia de xénero na prensa instalada pola Consellería de Cultura, Educación e Universidade.