Esta mañá, o alcalde do Carballiño, Francisco Fumega, anunciaba que hoxe mesmo se procedera á adxudicación do proxecto de museización da Fábrica de Papel. A este concurso público presentáronse tres empresas, e a adxudicataria foi unha valenciana, que ademais permite abaratar o custe do proxecto en 30.000 euros, ata un total orzamentado de 170.000 euros, que será financiado pola Xunta de Galicia.
Dentro deste proxecto, contémplase que os visitantes poidan facer eles mesmos papel en directo a través de papel xa usado, dándolle unha nova vida. O alcalde explicounos máis detalles sobre o proxecto, no que no andar baixo terá tres zonas: encolado, bruñido e preparación de papel. Nesta zona tamén haberá expostas mostras de papel antigas que se foron recuperando.
No primeiro andar estará todo o proceso de tendido do papel e unha explicación e mostra da creación do papel na comarca do río Arenteiro. No segundo andar crearase un auditorio para 40 persoas e unha visión xeral de todo o que será a fábrica. Fora do proxecto, e financiado polo concello, estase redactando a creación dos mazos exteriores, que será elaborado por un artesán local.
O prazo de execución será de seis meses, tres neste ano e outro tres no próximo, e o alcalde conta que para o mes de marzo ou abril de 2023 poida ser inaugurado. O concello colaborará ca Xunta para que este sexa o Museo do Papel de Galicia e estea integrado na rede de museos.
