Gabriel Alén pon en valor o papel das asociacións de comerciantes no impulso dos negocios locais

Este serán, no peche da campaña Mercar no teu comercio ten premio, na cidade de Ourense

  • A campaña desenvólvese en máis de 40 localidades de toda Galicia e en 11 da provincia de Ourense; O Barco, Allariz, Xinzo de Limia, Verín, Ourense cidade, Ribadavia, Celanova, O Carballiño, Castro Caldelas, Maceda e Barbadás
  • Esta iniciativa complementa as distintas accións impulsadas pola Xunta de Galicia para reactivar o consumo, entre as que destaca a segunda edición do Bono Activa Comercio; programa da Vicepresidencia primeira e Consellería de Economía, Industria e Innovación  que permitirá mobilizar máis de 17M€ en compras

Ourense, 21 de outubro de 2022.- O delegado territorial da Xunta en Ourense, Gabriel Alén,  participou este serán no peche da campaña Mercar no teu comercio ten premio, na cidade de Ourense, impulsada pola Federación Galega de Comercio co apoio da Xunta de Galicia co obxectivo de achegar o consumidor aos establecementos locais e poñer en valor as súas vantaxes.

AVANTAR ACTIVIDADES

O delegado territorial da Xunta, salientou o papel das asociacións de comerciantes no impulso dos negocios locais, traballando de xeito conxunto para incrementar a súa competitividade e achegar novos servizos aos consumidores.

A iniciativa desenvólvese en máis de 40 localidades de toda Galicia e en 11 da provincia de Ourense (O Barco, Allariz, Xinzo de Limia, Verín, Ourense cidade, Ribadavia, Celanova, O Carballiño, Castro Caldelas, Maceda e Barbadás), sorteando máis de 40.000 euros en premios entre os clientes do comercio de proximidade. Estenderase ata finais de novembro a través de campañas dunha semana de duración en cada unha das localidades.

Os tíckets das compras realizadas no comercio local nese tempo poderán cambiarse o día final da campaña por boletos de participación no sorteo en directo de premios, consistentes en tarxetas prepago de 30 e 50 euros.

Esta iniciativa complementa as distintas accións impulsadas pola Xunta de Galicia para reactivar o consumo, entre as que destaca a segunda edición do Bono Activa Comercio. Este programa da Vicepresidencia primeira e Consellería de Economía, Industria e Innovación permitirá mobilizar máis de 17 millóns de euros en compras, fomentando deste xeito o consumo no comercio de proximidade. Os comercios xa se poden adherir a esta iniciativa na web https://www.bonosactivacomercio.gal/, mentres que os clientes poderán acceder a partir do luns, 24 de outubro, a un bono desconto por un valor de 30 euros para as compras nos comercios adheridos.

Cun orzamento que alcanza os 5 millóns de euros, este programa da Xunta súmase ás diferentes liñas de axudas específicas para o comercio galego promovidas pola Vicepresidencia primeira e Consellería de Economía, Industria e Innovación, centradas en eidos como a transformación dixital e a modernización do sector, así como para a dinamización e incentivación do consumo a través dos centros comerciais abertos e federacións de comerciantes e o impulso das prazas de abastos.