Nesta terceira edición o Roteiro saiu do antigo Hotel Carlos do Carballiño ata a Casa do Zapateiro, na Ponte-Irixo.
En xullo de 1926 ( Ano Santo Compostelán) un grupo de 7 galeguistas de Ourense ( Vicente Risco, Ramón Otero Pedrayo, Florentino L. Cuevillas, Alfonso V. Monxardín, Antón Sanchez, Lois Feixoo e Xavier Pardo Bedia), todos membros do Seminario de Estudos Galegos ( 1923) fixeron a pé o traxecto entre Ourense e Santiago ( 105 km).
Seguiron un itinerario coñecido, desde a Idade Media, como Camiño dos Arrieiros, recollido na Carta Geométrica de Galicia de Domingo Fontán ( 1845). Este camiño atravesa un total de 11 concellos, 5 da provincia de Ourense, 3 da de Pontevedra e 3 da Coruña.
A crónica da peregrinaxe,
realizada entre o 8 e o 11 de xullo
en catro etapas: Ourense-O Carballiño, O Carballiño-Silleda, Silleda-Ponte Ulla e Ponte Ulla-Santiago, foi recollida por Xavier Pardo Bedia no periódico A Nosa Terra, órgano das Irmandades da Fala.
En 2020, ano do centenario da revista Nós, Luís González Tosar recolleu no libro O Camiño de Nós, con fotos de Xulio Gil, as 7 narracións de Xavier Pardo e outros materiais relativos a este histórico itinerario cultural.
Constituída a Asociación de Concellos do Camiño de Nós en 2021, a Fundación Insua dos Poetas, cuxo predio atravesaron os ilustres camiñantes, ven organizando, desde esa data, a comezos do outono, o Roteiro Camiño de de Nós.
