Realizadas no marco das reunións dos grupos de traballo de Proxecto de País, en Santiago de Compostela. Dan a coñecer algunhas das principais propostas de Sumar Galicia en materia de saúde mental:
1. Garantir a existencia dunha unidade de saúde mental en todos os centros de saúde do país.
Se Sumar está no Goberno, haberá profesionais da saúde mental en cada centro de saúde do país, para garantir unha atención real á saúde mental da poboación e, especialmente, para a atención neste ámbito á xente nova, colectivo especialmente maltratado.
2. Reforzar os equipos profesionais das Unidades de Saúde Mental Infanto—Xuvenil incorporando un novo servizo de acompañamento ás familias e ás crianzas e adolescentes despois dos ingresos ou crises e no tránsito á escola e ao fogar. Este servizo incluiría visitas domiciliarias, seguimento escolar e apoio na reintegración á contorna familiar e escolar. Realizaríase a través da creación de equipos multidisciplinares que garantan atención integral no ámbito da saúde mental (con enfermeiras, psicólogas, psiquiatra, traballadora social, terapeuta ocupacional e educadoras sociais).
Trátase dun modelo comunitario e multidisciplinar, para que a atención á saúde mental non se limite a ir a consulta, se non que teña unha continuidade na atención en diferentes ámbitos e con todos o profesionais comunitarios.
3. Estenderemos a atención á saúde mental infanto-xuvenil ata os 18 anos (non como ata o de agora, que é ata os 15). A prioridade do novo goberno debe garantir a atención integral en saúde mental aos nenos, nenas e adolescentes (NNA).
Ademais, na parte educativa, dotaremos aos equipos de orientación con novos perfís profesionais (psicólogos, educadores sociais e traballadores sociais) para traballar na prevención e exercer de mediadores entre a comunidade educativa e a sociedade, mellorar a convivencia e atender a factores culturais, sociais, afectivo-sexuais, que inflúen especialmente na xente nova, no rendemento académico dos menores e no benestar das familias. Atendemos así a unha demanda histórica das ANPAS e do profesorado.
