A Deputación investirá máis de medio millón de euros na mellora da accesibilidade e dos servizos na área recreativa de Cachamuíña

A Deputación de Ourense investirá máis de medio millón de euros (560.394€) na mellora da accesibilidade e dos servizos da área recreativa de Cachamuíña, no Concello de O Pereiro de Aguiar. A institución provincial, como entidade responsable da xestión deste espazo verde, levará a cabo a construción duns baños públicos (247.741 euros), un parque canino (47.653 euros), e a renovación da pasarela (265.000 euros), para continuar a dar maior valor a este espazo de natureza, ocio e deporte na área metropolitana de Ourense.

A primeira das actuacións a realizar é a construción dunha nova pasarela peatonal que vai permitir habilitar un novo tramo de sendeiro que mellore a accesibilidade e elimine as barreiras arquitectónicas que actualmente existen na ruta circular do encoro de Cachamuíña.

AVANTAR ACTIVIDADES

Con esta obra, cumprirase cos parámetros técnicos necesarios para garantir unhas condicións de accesibilidade, comodidade e seguridade óptimas para os usuarios que transiten pola ruta do encoro de Cachamuíña. Así mesmo, mellorará o aspecto estético do lugar coa construción dunha nova pasarela que permitirá diminuír os actuais custes de mantemento.