Espazo Común vén de facer pública unha nota de prensa na que critica abertamente ao grupo provincial do PSdeG-PSOE de Ourense por permitir, coa súa abstención no Pleno da Deputación, que os orzamentos desta institución foran aprobados para o vindeiro exercicio económico de 2025. Ao respecto, a formación política que lidera o carballiñés Manuel Vázquez lembra que, o pasado venres, “gracias á abstención dos deputados provinciais do Grupo Socialista, sacaron adiante o PP e o seu presidente Luís Menor uns orzamentos para o 2025 que seguen a semellarse moito aos de sempre só que algúns alcaldes socialistas da provincia reciben unhas migallas máis ca antes”.
Tamén comentan, dende Espazo Común, que “polo demáis, o organismo provincial segue a ser o eixo do enchufismo popular con dúcias de familiares de candidatos e alcaldes traballando alí a cambio da súa lealdade política ao partido da gueivota”, e engaden que “a transparencia tamén brila pola súa ausencia para o que basta ollar o portal existente a estes efectos na súa páxina web”. Por outra banda, apuntan que “o 80% dos recursos económicos, ao completo dispor de Menor, seguirán a ser empregados para mercar vontades, afianzar un modelo caciquil e servil de provincia e continuar no ímprobo traballo de afundir a Ourense en tódolos indicadores socioeconómicos máis e máis”.
“O PSdeG-PSOE que fai pouco tempo falaba da necesidade de fumigar a Deputación e abrir ás ventás do Pazo, é agora cómplice necesario do Partido Popular nun contubernio que só se explica convertido nunha párabola da historia das 30 moedas”, consideran dende Espazo Común. “Só que o que se suicida desta volta é a propia provincia. PP e PSOE deberían deixar de enganar á cidadanía e fundirse nun só partido cuxo obxectivo final é arranxar o deles mesmos obviando todo o demáis”, conclúen.
