Ribeiro en Común (REC) volve reivindicar que se adopten medidas para que as estradas do municipio de Ribadavia sexan seguras para vehículos e peóns, neste caso concreto, a travesía da localidade de San Cristovo de Regodeigón, onde se inicia o coñecido como Eixo do Ribeiro (OU-504), que comunica Ribadavia coa provincia de Lugo ao traverso do Carballiño e San Cristovo de Cea. Dende esta formación política lembran que “o Concello, no pasado mandato, co goberno de coalición, logrou un investimento moi importante, que permitiu o arranxo das beirarrúas de San Cristovo, grazas ao apoio da Confederación Hidrográfica do Miño-Sil (CHMS).
Dende Ribeiro en Común subliñan que, “daquela, cando se estaba executando esta obra, desde o PP, na oposición, coa intención de menoscabar unha obra tan importante, reclamada durante décadas, afirmou en 2022 que a Xunta ía arranxar a calzada de maneira inminente”. E engaden que “volveu dicilo en campaña electoral, en 2023, case hai dous anos. Agora sabemos que era mentira, como tantas outras cousas”.
Para REC, “a situación actual desta estrada é absolutamente inaceptable, sen que o goberno municipal teña realizado ningunha xestión frutífera para resolvelo”, e apuntan que no ano 2019 “xa reclamabamos que a Xunta realizara obras para reforzar a seguridade vial na OU-504 ao seu paso da parroquia de San Cristovo de Regodeigón. Daquela pediamos medidas de prevención como badéns, pasos de peóns ou unha mellor sinalización vial”.
Xa nos anos 2021, 2022 e 2023 seguiron reclamando desde o goberno local a necesidade de que a Xunta realice melloras urxentes de seguridade vial nesta estrada ao seu paso pola localidade de San Cristovo, xa que “é un tramo de moita afluencia e tránsito, polo que esta obra debería ser unha prioridade urxente para a Xunta e o Concello”. Consideran que “non é comprensible que o Concello estea priorizar outras vías e camiños, incluso no propio pobo de San Cristovo, antes que nesta arteria fundamental, tanto para o núcleo de San Cristovo como para o municipio”.
Por todo elo, dende Ribeiro en Común voltan reclamar, “que se acometa esta obra con urxencia a mellora desta vía, e que se instalen medidas de prevención tales como badéns que reduzan a velocidade do tráfico ó seu paso polo núcleo de San Cristovo, así como pasos de peóns e unha mellor sinalización vial, tanto horizontal como vertical”.
