Esta Semana Santa do Carballiño será a máis densa da historia en canto ao número de actividades programadas pola Cofradía da Vera Cruz en colaboración coa parroquia de San Cibrao, o Concello e a Deputación Provincial. No programa que se presentou hoxe destaca a incorporación dunha nova imaxe da Nosa Señora da Esperanza, que se suma aos dous pasos da procesión do Xoves Santo, así como dous roteiros culturais polas igrexas da vila e da contorna. Estas novidades teñen como obxectivo seguir potenciando a Semana Santa carballiñesa coa expectativa de que a próxima edición conte xa coa declaración de Interese Turístico de Galicia, para o cal xa se realizaron todos os trámites pertinentes.
O salón de actos da Casa do Concello acolleu esta mañá o acto de presentación, que foi conducido pola periodista e presentadora do Telexornal da TVG Raquel Domínguez Carrete e que contou coa asistencia do alcalde, Francisco Fumega, do cofrade maior, Rafael Melero, entre outros integrantes do colectivo, e o párroco Jorge Juan Pérez, anunciouse que o pregón correrá a cargo do expresidente do goberno español Mariano Rajoy, que pasou unha boa parte da súa infancia na vila carballiñesa, onde o seu pai exerceu de xuíz do partido xudicial do Carballiño dende mediados dos anos 50 ata ben entrados os anos 60 do pasado século.
Rafael Melero resaltou que “unha das características que definen a nosa Semana Santa é a súa autenticidade”, e citou o traballo dos costaleiros, as cantigas ao paso das procesións e o marco incomparable do templo da Veracruz. O cofrade maior da Vera Cruz anunciou a incorporación este ano dunha nova talla, á de Nosa Señora da Doce Esperanza, que acompañará a imaxe de Xesús da Sentenza e da Misericordia na procesión do Xoves Santo. Tamén se referíu á procesión do Cristo da Saúde, o Venres Santo, na que participará unha comitiva de máis de 350 persoas e que ten coma momento máis relevante o Santo Encontro da Virxe con Xesucristo.
O alcalde, Francisco Fumega quixo agradecer “o traballo contínuo da Cofradía nestes 18 anos conseguindo transformar a Semana Santa do Carballiño nunha das senlleiras da provincia e incluso de Galicia”. Neste sentido, o alcalde anunciou que “dende o Concello e a Cofradía estamos a rematar os trámites para solicitar da Xunta a súa declaración como celebración de interese turístico galego”.
Unha das citas máis destacadas do programa será a presenza do que fora presidente do Goberno de España entre 2011 e 2018, Mariano Rajoy Brey, encargado de dar lectura ao pregón inaugural, un acto que terá lugar o Domingo de Pasión, 6 de abril, ás 12,30 horas, no templo da Veracruz, e que terá o acompañamento musical da Coral de Ruada de Ourense.
Tres conferencias, dous roteiros guiados, unha exposición, un concerto de música e seis procesións e actos litúrxicos que contarán co acompañamento de sete bandas, tres corais e oito saeteiros e saeteiras conforman a programación elaborada pola Cofradía da Vera Cruz carballiñesa, que pode consultarse no enlace www.semanasantaocarballiño.es.
