O “VII Car Outlet Ourense”, que ía ter lugar en Expourense esta fin de semana, do 25 ao 27 de abril, posponse 15 días e celebrarase definitivamente entre o 9 e o 11 de maio. As dúas entidades organizadoras desta cita, Expourense e a Asociación de Concesionarios de Automóbiles de Ourense (ACAUTO), decidiron no día de onte adiar este evento logo do repentino falecemento do presidente de ACAUTO, Ramón Seijas Pérez.
Ramón Seijas foi un dos principais promotores e valedores tanto do Car Outlet como dos dous Salóns do Automóbil (Novo e de Ocasión) que se celebran no recinto nos meses de outubro ou novembro. Expourense lamenta profundamente este pasamento, agradecéndolle todos estes anos de estreita cooperación no seu papel á fronte de ACAUTO e trasmitíndolle ao mesmo tempo todo o seu ánimo e apoio á xunta directiva desta Asociacón.
O “VII Car Outlet Ourense” celebrarase en Expourense entre o 9 e o 11 de maio e está confirmada a participación de 15 concesionarios de ACAUTO que representan a un total de 27 marcas. Esta cita voltará ofrecer as mellores oportunidades do mercado de vehículos de ocasión e segunda man con todas as garantías que brindan os concesionarios oficiais.
O horario de apertura do salón será, o venres 9 de maio, de 11,00 a 20,30 horas; o sábado 10, de 10,00 a 20,30 horas, e o domingo 11, de 11,00 a 20,00 horas. A entrada terá un custo de 3 euros, sendo gratuíta para os menores de 12 anos. Haberá ademais un servizo de ludoteca gratuíto.
