https://www.facebook.com/share/v/1AKc5ymEnK
Xabón natural, tinta invisible e multicor, adiviñas baseadas en números e ata un vehículo ecolóxico movido por hidróxeno, son, entre outros os experimentos prácticos que mostraron á veciñanza as alumnas e os alumnos dos IES Chamoso Lamas e Nº 1 do Carballiño, nunha nova edición, a terceira, da ‘Feira Científica’, que tivo lugar na tarde de hoxe na praza dos Irmans Prieto da nosa vila.
Esta mostra é unha escolma do traballo que o estudantado dos dous centros de ensino secundario carballiñeses desenvolve ao longo de todo o curso lectivo, e que se organiza para darlle visibilidade, tal e como nos comentaban Almudena Mosquera, directora do IES Nº 1, e Aurelio Rodríguez, director do IES Chamoso Lamas, que amosaron a súa satisfacción polos resultados acadados.
Tamén estiveron presentes nesta feira profesorado e estudantes do CIFP de Vilamarín, cun innovador e xa galardonado proxecto de realidade virtual orientado ás recepcións hoteleiras, e que tamén ofreceron produtos de pastelería elaborados neste centro de formación profesional.
Unha sesión de tres horas nesta praza do centro do casco urbano que espertou curiosidade entre as moitas veciñas e veciños que transitaban pola zona e se achegaron a admirar as propostas experimentais do alumnado, nun evento que serve como clausura oficiosa do curso lectivo.
